धनगढी (हाम्रो खेलकुद) – सगरमाथा सिमेन्ट धनगढी प्रिमियर लिग (डीपिएल) विराटनगर किंग्सले बुधबार क्वालिफायर्समा रुपन्देही च्यालेन्जर्सको सामना गर्नेछ । क्वालिफायर्सको अघिल्लो दिन मंगलबार शरद भेषावकरको कप्तानीमा रहेको विराटनगर किंग्सले मंगलबार परोपकारी कामका लागि समय निकाल्यो । धनगढीमा रहेको जनजाती कल्याण आश्राम आमाको माया छात्रबासमा गएर किंग्सले खेलकुद लगायतका सामाग्री प्रदान गर्यो ।

विराटनगर किंग्सका कप्तान शरद भेषावकर जनजाती कल्याण आश्रमका बालकलाई ब्याटिङ सिकाउँदै ।

१० वर्ष अगाडि धनगढी ५, तारानागरमा स्थापना रहेको छात्रबास मा अहिले २१ बालकहरुले आश्रय लिइरहेका छन् । २ सय घरबाट मुठ्ठि दान गरेर आश्रम चलाउदैं आइएको छ आश्रमका अध्यक्ष देवकुमार चौधरीले जानकारी दिए । विराटनगरका खेलाडी आशिफ शेख र सन्दीप लामिछानेले आश्रमका बालकहरुलाई आवश्यक स्टेशनरीका सामान, खाधन्न, खेल्ने सामाग्री प्रदान गरेका थिए । टोलीका अर्का खेलाडी दीपेन्द्रसिंह ऐरीले ब्याट प्रदान गरे ।

‘धनगढी आएको पहिलो दिन देखि हामी कुनै अनाथलमा गएर आफ्नो तर्फबाट केही गर्न चाहान्थ्यौं । धनगढी क्रिकेट एकेडेमीका अध्यक्ष सुवाश शाही र आयोजक समितिका सौरभ ओझासँग सल्लाह गरेका थियौं,’ कप्तान शरदले भने, ‘ मान्छे भएपछि उसले समाजमा केही योगदान दिनुपर्छ । सबैको आ आफ्नो क्षेत्र र कार्य हुन्छ तर जो जहाँ भए पनि एउटा मानवीय हिसाबमा केही गर्नुपर्छ भन्ने सोचाईमात्र हो ।’
उनले यो सामाजीक कार्य टिम बनाउने एउटा प्रयास भएको पनि बताए । आश्रमका बालकहरुसँग शरद र सन्दीपले टेनिस बलमा ब्याटिङ गरेका थिए भने अन्य केही खेलाडीले आश्रमका बालकलाई बलिङ गरेका थिए । आश्रमका अध्यक्ष चौधरीले आश्रममा बालकहरुलाई हिन्दु संस्कार र संस्कृति सिकाइने जानकारी दिए ।

आश्रमका बालकहरुलाई स्थानिय विद्यालयहरुले निशुल्क छात्रबृद्धि दिएको पनि चौधरीले जानकारी दिए बताए । आश्रमका अविभावक नभएका र भएका दुवैथरी बालकहरु रहेका अध्यक्ष चौधरीले जानकारी दिए । चौधरीले आफुले बालकहरुलाई डिपीएल हेर्न लगेको र उनीहरुले मनोरञ्जन लिने गरेको बताए ।