धनगढी (हाम्रो खेलकुद) – धनगढी प्रिमिएर लिग अन्तर्गत प्लेअफ चरणको पहिलो क्वालिफायर खेलमा शक्ति गौचनको कप्तानीमा रहेको रुपन्देही च्यालेन्जर्स र शरद भेषावकरको कप्तानीमा रहेको बिराटनगर किङस भिड्दैछन्।

लिग चरणमा शीर्षस्थानमा रही छनोट भएको रुपन्देहीले आफुले खेलेको पाँच खेलमध्य चार खेलमा जित दर्ता गरेको थियो। उता बिराटनगरले भने ३ जित र २ हारसंगै ६ अंकका साथ लिग तालिकाको दोश्रो स्थानमा रहेर छनोट भएको हो। यी दुइ टोलीबिचको लिग चरणको खेलमा रुपन्देही ६१ रनले विजयी भएको थियो। रुपन्देहीको सहज जितमा बलरहरुले उत्कृष्ट प्रदर्शन गरेका थिए। पहिलो ब्याटिङ गरेको रुपन्देहीले निर्धारित २० ओभरमा ८ विकेट गुमाउँदै १३२ रन जोड्दा लक्ष्य पछ्याएको बिराटनगर ७१ रनको झिनो स्कोरमै अलआउट भएको थियो।

प्रतियोगिताको अन्तिम लिग खेलमा रुपन्देही टिम चौराह धनगढीसंग पराजित भएको थियो। रुपन्देहीले प्रतियोगितामा पहिलो ब्याटिङ गरेको खेलमा हार व्येहोरेको छैन। उता बिराटनगरले आफ्नो पछिल्लो खेल २ दिन अघि रुपन्देहीसंग खेलेको थियो। ब्याटिङमा कप्तान शरद भेषावकरबाहेक कसैले दोहोरो स्कोर छुन नसकेपछि बिराटनगर पराजित भएको थियो।

बिराटनगरले आफ्नो पछिल्लो खेलमा पेस बलर जितेन्द्र मुखियालाई चोटका कारण विश्राम दिएको थियो। यद्दपी उनि भोलि हुने खेलको लागि भने फिट हुने विश्वास छ। यस्तै, रुपन्देहीले आफ्ना २ पेस बलर बिक्रम सोब र दिपेश श्रेष्ठलाई अन्तिम लिग खेलमा विश्राम दिएको थियो।

पहिलो क्वालिफायर्स जित्ने टोली सिधै फाइनल प्रवेश गर्नेछ भने पराजित हुने टोलीले एलिमिनेटरको विजेतासंग पुन: फाइनल प्रवेशका निम्ति दोश्रो क्वालिफायर्स खेल्नेछ। खेल बुधबार बिहान ९ बजे धनगढी स्थित अंचल प्रहरी कार्यालयको मैदानमा हुनेछ।