धनगढी (हाम्रो खेलकुद) – धनगढी प्रिमिएर लिग अन्तर्गत लिग चरणको खेल समाप्त भएसंगै प्लेअफमा पुग्ने टोली र प्लेअफ समीकरण पनि पुरा भएको छ।

लिगको पाँच खेलमा ४ जित र १ हारसंगै ८ अंक जोडेको रुपन्देही लिग तालिकाको शीर्षस्थानमा रह्यो। उसले ६ अंक बोकेर दोश्रो स्थानमा रहेको बिराटनगर किङससंग पहिलो क्वालिफायर खेल खेल्नेछ। यस खेलमा जित हात पर्ने टोलीले फाइनलमा स्थान बनाउनेछ भने हर्ने टोलीले फाइनल पुग्न अर्को एक खेल जित्नु पर्ने हुन्छ। एलिमिनेटरको विजेता र पहिलो क्वालिफायरमा पराजित हुने टोलीले दोश्रो क्वालिफायरमा भिड्नेछन्।

एलिमिनेटरमा समान ४ अंक बोकेका तेश्रो स्थानको काठमाडौँ गोल्डेन्स र चौथो स्थानमा रहेको टिम चौराह धनगढी खेल्नेछन्। पुछारका ४ टोलीको समान ४ अंक भएपनि राम्रो रनरेटका कारण गोल्डेन्स र चौराह एलिमिनेटरमा पुगेका हुन्।

कन्चनपुर् आइकोनिक र सिवाईसी अत्तरिया पहिलो चरणबाटै बाहिरिएका छन्। पहिलो क्वालिफायर बुधबार ९ बजे हुनेछ भने एलिमिनेटर बुधबार दिउसो १ बजे सुरु हुनेछ। दोश्रो क्वालिफायर बिहिबार बिहान ९ बजेलाई राखिएको छ।

प्रतियोगिताको फाइनल खेल पहिलो र दोश्रो क्वालिफायरको विजेताबीच शनिबार हुनेछ।