धनगढी (हाम्रो खेलकुद)– कञ्चनपुर आइकोनिकलेलिग चरणको आफ्नो अन्तिम खेलमा आज सिवाइसी अत्तरियालाई ६ विकेटले हराएसँगै सगरमाथा सिमेन्ट धनगढी प्रिमियर लिग (डिपिएल) को प्ले-अफमा पुग्ने सम्भावनालाई जीवित राखेको छ । प्ले अफ पुग्न महत्वपूर्ण मानिएको खेल गुमाएपछि ज्ञानेन्द्र मल्लको कप्तानमा रहेको अत्तरिया डिपिएलबाट बाहिरिएको छ । ६ टोलीको सहभागिता रहेको डिपिएलबाट बाहिरिने अत्तरिया पहिलो टोली बनेको छ ।

अत्तरियाको हारपछि काठमाडौं गोल्डेन्स नेट रनरेटको आधारमा प्ले अफमा पुगेको छ । गोल्डेन्स, कञ्चपुर र अत्तरियाको समान ४ अंक छ । रुपन्देही शीर्षस्थानमा रहँदै प्ले अफमा पुगिसकेको छ । रुपन्देहीसँग आज पहिलो खेलमा पराजित भएपछि विराटनगर किङ्स दोस्रो स्थानमा रहँदै प्ले अफ पुगिसकेको छ । कञ्चनपुर र पारस खड्काको कप्तानीमा रहेको धनगढी टिम चौराहामध्ये एउटा प्ले अफमा पुग्ने अन्तिम टोली बन्नेछ । पारसको टोलीले लिगको अन्तिम खेलमा शक्ति गौचनको नेतृत्वमा रहेको अपराजित रुपन्देहीसँग खेल्नेछ । सोमबार हुने खेल जितेमा मात्र पारस टोली अघि बढ्ने सम्भावना रहन्छ । शक्तिको टोलीसँग हारेमा भने टोली स्वतः बाहिरिनेछ ।

अञ्चल प्रहरी कार्यालयको मैदानमा आज भएको दोस्रो खेलमा ८६ रनको लक्ष्य पछ्याएको कञ्चनपुरले १० ओभरमा ४ विकेट गुमाउँदै ९० रन जोडेको थियो । कप्तान विनोद भण्डारीले छक्का प्रहार गर्दै टोलीलाई जित दिलाएका थिए । प्ले अफमा पुग्ने सम्भवाना जीवित राख्न कञ्चनपुरले अत्तरियालाई १३ ओभर भित्र हराउनु पर्ने थियो । तर, टोलीले १० ओभर भित्रै खेल जितेको थियो ।

कञ्चनपुरका लागि ओपनर सागर पुन र सुनिल धमलाले राम्रो सुरुआत दिलाउँदै टोलीको जितको आधार तयार पारेका थिए । सागरले २२, सुनिलले २८, हसिम अन्सारीले २२ र विनोद भण्डारीले अविजित १६ रन बनाएका थिए । अत्तरियाका लागि विनोद लामाले २, ज्ञानेन्द्र कुँवरले १ विकेट लिए ।

टस हारेर ब्याटिङ गरेको अत्तरियाले निर्धारित २० ओभरको सबै विकेट गुमाएर ८५ रनको झिनो स्कोर बनाएको थियो । टोलीका लागि प्रदीप ऐरी १९, दीलिप नाथले ११, ज्ञानेन्द्र कुँवरले अविजित ११ र सुरेन्द्र चन्दले १० रन बाहेक अन्य कुनै पनि खेलाडीले दोहोरो अंकमा रन जोड्न सकेनन् ।

कञ्चनपुरका लागि सुनिल धमाला, अभिनाष कर्णले समान ३, सागर पुन, आशिष पोखरेल र चन्द्र साउदले समान १ विकेट लिए ।
कञ्चनपुरका सुनिल धमला खेलेको म्यान अफ दी म्याच घोषित भए ।