धनगढी (हाम्रो खेलकुद)  – सगरमाथा सिमेन्ट धनगढी प्रिमिएर लिगमा आरिफ शेखको अर्धशतकको मद्दतले धनगढी टिम चौराहले काठमाडौँ गोल्डेन्स सामु १३७ रनको लक्ष्य तयार पारेको छ। टस जितेर पहिले ब्याटिङ रोजेको चौराहले निर्धारित २० ओभरमा ८ विकेट गुमाउदै १३६ रन बनाएको थियो।

४५ बलको सामना गर्दै ५८ रन बनाएका आरिफ इनिङ्को अन्तिम ओभरमा सोमपाल कामीको बलमा बोल्ड भएका थिए। सोमपालको तेस्रो बलमा बोल्ड हुनुभन्दा १ बल अगाडीको ‘फुल टस’ बललाई आरिफले मिडविकेटको दिशा दिदैं प्रतियोगिताकै लामो छक्का प्रहार गरेका थिए। आरिफले ५ चौका र ३ छक्का प्रहार गरेका थिए। प्रतियोगितामा बलरलाई समर्थन गरेको यो पिचमा दोस्रो अर्धशतक हो भने प्रतियोगिताकै व्यक्तिगत राम्रो स्कोर पनि हो। यसअघि अत्तरियाकालागि योगेन्द्र सिंह कार्कीले गोल्डेन्सविरुद्ध ५७ रन बनाएका थिए ।

१८ औ ओभरमा सोमपल कामिको पहिलो बलमा १ रन लिदै आरिफले आफ्नो अर्धशतक पुरा गरेका थिए ।

टिम चौराहकालागि पारीको सुरु गरेका अनिल मण्डलले २९ बलमा २९ रन जोडे भने सौरभ खनालले ८ बल खेल्दै १६ रनको योगदान दिए । बलिङ्तर्फ गोल्डेन्सका लागि सोमपाल र मन्जितले ३ विकेट लिए भने वसन्त रेग्मी र सन्तोष भट्टले १ विकेट लिए ।