एजेन्सी – इन्डियन प्रिमिएर लिग अन्तर्गत शुक्रबार राती भएको खेलमा एन्ड्रयु टाईले डेब्युमै उत्कृष्ट बलिङ गरेपछि गुजरात लायन्सले सिजनको पहिलो जित दर्ता गर्यो।

टस जितेर पहिलो बलिङ गरेको गुजरातके ओपनर रहानेलाई पहिलो बलमै पेभेलियन फर्काएर सुखद सुरुवात गरेको थियो। तेश्रो नम्बरमा आएका कप्तान स्टिभ स्मिथले राहुल त्रिपाठीसंग मिलेर दोश्रो विकेटको लागि ३२ बलमा ६४ रन जोडेपछि पुने खेलमा फर्किएको थियो। त्रिपाठी १७ बलमा ३३ रन बनाएर आउट भए भने स्मिथले ४३ रन बनाउन २८ बल खेले।

बेन स्टोक्सले एन्ड्रयु टाईको बलमा बोल्ड हुनुअघि २५ रन जोडे। धोनीले ८ बलमा ५ रन जोड्दै पुन: समर्थकहरुलाई निराश परेका थिए। मनोज तिवारीले ३१ रन र अंकित शर्माले २५ रन जोडेपछि पुनेले ८ विकेटको क्षतिमा १७१ रनको योगफल तयार पार्यो। एन्ड्रयुटाईले ४ ओभरमा १७ रन खर्चेर ५ विकेट लिएका थिए। उनलाई साथ दिंदै प्रविन कुमार, रबिन्द्र जदेजा र ड्वेन स्मिथले १/१ विकेट लिए।

जवाफी ब्याटिङमा उत्रिएको गुजरातले ओपनरद्वय ब्रेण्डन मक्कुलम र ड्वेन स्मिथको राम्रो सुरुवात पायो। ८.५ ओभरमा ९४ रनको स्थितिमा आउट हुनुअघि ड्वेन स्मिथले ३० बलमा ४७ रन जोडे। मक्कुलमले ३२ बलमा ५ चौका र ३ छक्का प्रहार गर्दै ४९ रन बनाए। दिनेश कार्तिकले ३ रन मात्र जोड्न सके र उनि इमरान ताहिरको बलमा बोल्ड भए।

गुजरातलाई जित दिलाउन कप्तान सुरेश रैना ३५ रनको अविजित पारी खेले भने आरोन फिंचले ३३ रन बनाउदैं उनलाई साथ दिए। रैनाले २२ बल खेल्दै ४ चौका र १ छक्का प्रहार गरेका थिए भने फिंचले आफ्नो १९ बलको पारीमा ३ चौका र २ छक्का हाने। पुनको लागि शार्दुल ठाकुर, इमरान ताहिर र राहुल चाहरले १/१ विकेट लिए।

पहिलो इनिङसमा ५ विकेट लिएका एन्ड्रयु टाई म्यान अफ द म्याच भए।