धनगढी (हाम्रो खेलकुद) – सगरमाथा सिमेन्ट धनगढी प्रिमियर लिगमा शुक्रबारको पहिलो खेलमा टस जितेर पहिले ब्याटिङ रोजेको रुपन्देही च्यालेन्जर्सले काठमाडौँ गोल्डेन्स सामु १३६ रनको लक्ष्य प्रस्तुत गरेको छ ।

इनिङ्सको पहिलो बलमा सोमपाल कामीले हरिशंकर शाहलाई एलबिडब्लु धरापमा पार्दै पेभेलियन फर्काएपछि ब्याटिङमा आएका नुरध्वज शेनको बिष्फोटक ब्याटिङको मद्दतले रुपन्देहीले राम्रो सुरुवात गरेको हो। नुरध्वज ३ छक्का र ३ चौकाको मद्दतले २२ बलको सामना गर्दै ३७ रन बनाएर फर्किए। नुरध्वजसँग ४६ रनको साझेदारी बनाएका शंकर रानाले ३६ बलमा १६ रन बनाए ।

त्यस्तै नुरध्वजको स्थानमा आएका पुष्प थापाले पनि मध्यक्रममा रुपन्देहीको स्कोरमा महत्वपूर्ण योगदान दिए। सोमपाल कामीको बलमा कट बिहाइन्ड हुनु अघि पुष्पले ४ चौका र १ छक्काको मद्धतले ३३ बलमा ३६ रन बनाएका थिए । रुपन्देहीले प्रकाश केसीको १२ तथा बिक्रम सोबले १ चौका र १ छक्का प्राहर गर्दै १० रनको योगदान दिदै १३५ रनको योगफल तयार पार्यो।

बलिङतर्फ ४ ओभर गरेका सोमपालले १ मेडेन दिदै ४ विकेट लिए भने मन्जित श्रेष्ठ, कप्तान वसन्त रेग्मी र सन्तोष भट्टले १-१ विकेट लिए ।