दिपेन्द्र पोखरेल

धनगढी –  धनगढीमा जारी डीपिएल क्रिकेटको पाचौ खेलमा पनि टसले महत्वपूर्ण भूमिका निर्वाह गरेको छ । टस जितेर पहिलो ब्याटिंग गरेको रुपन्देही च्यालेन्जर्सले सिवाईसी अत्तरियालाई ४२ रनले पराजित गरेको हो। डीपीएलमा पाँच खेल सम्पन्न हुदा अहिलेसम्म दोस्रो ब्याटिंग गर्ने टोलीले जित हासिल गर्न सकेको छैन । खेलमा चार विकेट लिएका सहाब आलम म्यान अफ द म्याच  घोषित हुदै नगद १० हजार प्राप्त गरे ।

१३० रनको लक्ष्य पछ्याएको अत्तरियाले राम्रो सुरुवात गर्न सकेन । ३ ओभरको अन्त्यमा ४ रन बनाउदै २ विकेट गुमाएको अत्तरियाका लागि चौथो ओभरमा चार छक्का प्रहार गर्दै अत्तरियाको चेजमा गति समातेका थिए । तर मल्ललाई ननस्ट्राइकरमा अन्य ब्याट्सम्यानहरुले साथ दिन नसकेपछि दोस्रो ब्याटिंग गरेको टोली ८७ रनमा सिमित भयो ।

पहिलो खेलमा पनि उत्कृष्ट बलिंग गरेका शाहब आलमले आफ्नो पहिलो दुइ बलमा दुइ विकेट लिदै रुपन्देहीलाई बलियो स्तिथिमा पुर्याएका थिए । पहिलो बलमा योगेन्द्र सिंह कार्कीलाई कट एण्ड बोल्ड गरेका आलमले दोस्रो बलमा महबुब आलमलाई एलबिडब्लुको सिकार बनाएका थिए । आफ्नो तेसो ओभरमा मेडेन दिदै विकेट लिने क्रममा आलमले अत्तरियाका कप्तानलाई आउट गर्दै खेल पूर्ण रुपले रुपन्देहीको कब्जामा पुर्याएका थिए । ३० रन बनाएका मल्ल हरिशंखर शाहको हातमा क्याच भएका थिए ।

आलमले कुल ४ ओभर गर्दै ८ रन खर्चिएर ४ विकेट लिए । उनले पहिलो खेलमा पनि ४ ओभर गर्दै ८ रन मात्र खर्चिएर ३ विकेट लिएका थिए ।  त्यस्तै बिक्रम सोबले २ विकेट लिए भने कृष्ण कार्की , पुष्प थापा र कप्तान शक्ति गौचनले १-१ विकेट लिए ।

टस जितेर पहिले ब्याटिंग रोजेको रुपन्देही च्यालेनजर्सले निर्धारित २० ओभरमा १२९ रन बनाएको थियो । रुपन्देहीको पहिलो खेलमा राम्रो ब्याटिंग गरेका ओपनर हरिशंखर शाहले कुनै रन नब्नाउदै पहिलो ओभरमा आउट भए । त्यस्तै पहिलो विकेटको पतन पछि आएका कप्तान शक्ति गौचनपनि ४ रन मात्र बनाउदै आउट भएपछि रुपन्देहीमा दबाब सिर्जना भएको थियो ।

११ ओभरमा अर्का ओपनर शंखर रानालाई गुमाउदा रुपन्देही ५ विकेटको क्षतिमा ४८ रनको अवस्थामा थियो । छैठौ ओभरमा रिटायर्ड हर्ट हुदै मैदान बाहिर निस्किएका राना पुष्प थापाको विकेटपछि पुनः मैदानमा फर्किएका थिए । मिडल अर्डरमा प्रकाश केसी र राजेश पुलामीको शानदार ब्याटिंगको मद्धतले रुपन्देहीले सिवाईसी अत्तरियासामु १३० रनको लक्ष्य प्रस्तुत गर्न सफल भयो । २९ रनमा अविजित रहेका प्रकाशले ३ चौका र १ छक्का प्रहार गरे भने राजेश पुलामीले ३ छक्का प्रहार गर्दै ३१ रन बनाए ।

अत्तरियाकालागि बिनोद लामा र प्रदिप ऐरीले २ विकेट लिए भने महबुब आलम र अभिनास बोहोराले १ विकेट लिए ।