पुने (एजेन्सी) – सन्जु स्याम्सनले जारी आइपिएल सिजनकै पहिलो शतक प्रहार गरेपछि राइजिङ पुने  सुपरजाएन्ट्सले दिल्ली डेयरडेभिल्ससंग ९७ रनको हार व्येहोरेको छ।

टस जितेर फिल्डीङ रोजेको पुनेले दिल्लीका ओपनर आदित्य तारेलाई दोश्रो ओभरमै आउट गरेपनि स्याम्सनको उत्कृष्ट पारीसंगै खेलमा राम्रो पकड बनाउन सकेन। स्याम्सनले सिजनको पहिलो शतक बनाउने क्रममा ६३ बल खेल्दै १०२ रन जोडेका थिए। उनले ८ चौका र ६ छक्का प्रहार गरे। ओपनर स्याम बिलिङ्सले १७ बलमा २४ रन बनाए भने ऋशव पन्तले २२ बलमा ३१ रन जोडे। निर्धारित २० ओभरमा दिल्लीले ४ विकेट गुमाऊँदै २०५ रनको विशाल योगफल तयार पारेको थियो।

खेलको अन्तिम २ ओभरमा क्रिजमा उत्रिएका क्रिस मोरिसले ९ बलमा ४ चौका र ३ छक्का प्रहार गर्दै ३८ रन बनाएपछि दिल्लीले २०० रन पार गरेको थियो। पुनेका लागि दिपक चाहर, इमरान ताहिर र एडम ज्याम्पाले १/१ विकेट लिएका थिए।

ठुलो लक्ष्य पछ्याउन क्रिजमा उत्रिएको पुनेले सुरुवाती ओभर देखिनै लगातार विकेट गुमाएपछि खेलमा कुनै समय जिततर्फ अग्रसर देखिएन। ओपनर मयंक अग्रवालले पुनेका लागि सर्वाधिक २० रन जोडेका थिए। नियमित कप्तान स्टिभ स्मिथ पेटका समस्याका कारण अनुपस्थित भएपछि रहानेले पुनको कप्तानी सम्हालेका थिए। उनले ९ बलमा १० रन मात्र बनाए भने टोलीमा पहिलोपटक अटाएका राहुल त्रिपाठीले ५ बलमा १० रन जोडे।

फाफ डु प्लेसिस (८), बेन स्टोक्स (२) र महेन्द्र सिंह धोनी (११) रनमा आउट भएपछि पुनेको मध्यक्रम फ्लप भएको थियो। रजत भाटियाले १६ रन र दिपक चाहरले १४ रन बनाऊँदै पुनको १०० रन कटाएका थिए। पुनेले १६.१ ओभरमा आफ्नो सबै विकेट गुमाऊँदै १०८ रनमात्र जोड्न सक्यो। पुनेका सबै ब्याट्सम्यान क्याचआउट भएका थिए।

दिल्लीका लागि कप्तान जाहिर खान र अमित मिश्राले समान ३/३ विकेट लिएका थिए। प्याट कमिन्सले २ तथा सहबाज नदिम र मोरिसले पनि १/१ विकेट लिए।