दिपेन्द्र पोखरेल

धनगढी – सुदूरपश्चिमाञ्चलको धनगढीमा जारी धनगढी प्रिमियर लिग क्रिकेटको पहिलो खेलमा ज्ञानेन्द्र मल्लको कप्तानीमा रहेको सिवाइसी अत्तरीयाले वसन्त रेग्मीको काठमाडौँ गोल्डेन्सलाई ४० रनले पराजित गरेको छ ।

टस हारेर पहिले ब्याटिङ गरेको सिवाइसी अत्तरियाले निर्धारित २० ओभरमा ६ विकेट गुमाउदै १४६ रन बनायो । जवाफमा काठमाडौँ गोल्डेन्स सबै विकेट गुमाउदै १८ ओभर ४ बलमा १०६ रनमा समेटियो ।

अत्तरियाले पहिलो ओभरमा आफ्नो पहिलो विकेट गुमाएको थियो । दशौं ओभरमा आफ्नो कप्तान ज्ञानेन्द्र मल्ललाई ७ रनमा गुमाएको अत्तारियाले मेहबुब आलमलाई गुमाउदा ५ विकेटको क्षतिमा ५७ रन बनाएको थियो ।

अर्धशतक प्रहार गरेका सिवाइसी अत्तरियाका योगेन्द्र कार्की

सम्हालिएको ब्याटिंग गरेका योगेन्द्र सिंह कार्की र ज्ञानेन्द्र कुँवर बिचको ६९ रनको साझेदारीको मद्धतले सिवाइसी अत्तरियाले निर्धारित २० ओभरमा ६ विकेट गुमाउदै १४६ रन बनाउन सफल भयो ।

अर्धशतक प्रहार गरेका योगेन्द्रले ४१ बलको सामाना गर्दै ७ चौका र एक छक्काको मद्धतले ५७ रन जोडेका थिए । त्यस्तै ज्ञानेन्द्र कुवरले पाँच चौका प्रहार गर्दै ३४ रन जोडे ।

काठमाडौँ गोल्डेन्सकालागि सोमपाल कामीले दुइ तथा मन्जित श्रेष्ठ, सन्तोष भट्ट र रोहित कुमार पौडेलले समान १ विकेट लिए ।

१४७ रनको लक्ष्य बोकेको काठमाडौँ गोल्डेन्सका लागि माथिल्लो क्रमका ब्याट्सम्यानले राम्रो योगदान दिन सकेनन्। ३३ रनमा ७ विकेट गुमाएको काठमाडौँकालागि पहिलो पाँच ब्याट्सम्यानले दोहोरो अंक बनाउन सकेनन । सोमपाल कामि र सन्तोष भट्ट बीचको ६१ रनको साझेदारीले मिडल अर्डरमा काठमाडौँको ब्याटिङ सम्हालिएपनि सोमपाल(४०) र सन्तोष(३१) बाहेक कसैको ब्याट नचलेपछि काठमाडौँ १०६ रनमा सिमित भयो ।

अत्तरियाका लागि अविनाष बोहोराले ४, बिनोद लामाले ३ तथा सशी केसरी र प्रदिप ऐरीले समान १ विकेट लिए । धारिलो बलिङ गर्दै आफ्नोटोलीलाई जित दिलाएका अविनाष खेलको म्यान अफ द म्याच भए।