बेंगलोर (एजेन्सी) – इन्डियन प्रिमिएर लिग अन्तर्गत शनिबार भएको दोश्रो खेलमा दिल्ली डेयरडेभिल्स घरेलु टोली रोयल च्यालेन्जर्स बेंगलोरसंग १५ रनले पराजित भएको छ।

टस जितेर पहिलो ब्याटिङ रोजेको बेंगलोरले निर्धारित २० ओभरमा ८ विकेट गुमाऊँदै १५७ रनको योगफल खडा गरेको थियो। ओपनर क्रिस गेललाई ६ रनमा गुमाएको बेंगलोरले कप्तान वाटसनको ब्याटबाट २४ रनको योगदान पाएको थियो। लडखडाएको बेंगलोरको इनिङसलाई केदार जादभले सम्हालेका थिए। जादभले ३७ बलमा ६९ रन बनाऊँदा ५ चौका र ५ छक्का प्रहर गरेका थिए। दिल्लीका क्रिस मोरिसले ४ ओभरमा ३ विकेट लिए भने सहबाज नदीमले ४ ओभरमा जम्मा १२ रन खर्चेका थिए।

जवाफी ब्याटिङमा उत्रिएको दिल्लीले राम्रो सुरुवात पाए पनि लगातार विकेट गुमाएपछि २० ओभरमा ९ विकेटको क्षतिमा जम्मा १४२ रन जोड्न सक्यो। उसका लागि रिसब पन्तले ३६ बलमा ३ चौका र ४ छक्काको मद्दतले ५७ रन बनाए। पाँचौ नम्बरमा ब्याटिङ गर्न आएका पन्तपछि कुनै ब्याट्सम्यानले दोहोरो अंकमा रन बनाउन सकेनन्।

बेंगलोरका लागि युजभेंद्र चहलले ४ ओभरमा १९ रन खर्चेर १ विकेट लिए भने वाटसनले पनि ४ ओभरमा २१ रन खर्चिदै १ विकेट लिए। जितका लागि १९ रन आवश्यक परेको अवस्थामा अन्तिम ओभर मात्र बलिङ गरेका नेगीले ३ रन दिएर २ विकेट लिए। उनले ओभरको पहिलो बलमै पन्तलाई पेभेलियन फर्काएपछि बेंगलोरको जित पक्का भएको थियो।

बेंगलोरका केदार जादभ खेलको म्यान अफ द म्याच भए।