इन्दोर (एजेन्सी) – इन्डियन प्रिमिएर लिग(आइ.पी.एल) अन्तर्गत शनिबार भएको पहिलो खेलमा किङ्गस एलेभेन पन्जाबले राइजिङ्ग पुने सुपरजाएन्ट्सलाई ६ विकेटले पराजित गरेको छ।

टस जितेर फिल्डीङ रोजेको पन्जाबले पहिलो ओभरमै सफलता प्राप्त गरेको थियो पहिलो ओभरको पाँचौ बलमा मयंक अग्रवाललाई सन्दिप शर्माले बोल्ड गरेका थिए। पुनेका लागि अर्का ओपनर अजिंक्या रहानेले १९ रन बनाए भने स्टिभ स्मिथले २६ रन जोडे। मध्यक्रममा बेन स्टोक्स र मनोज तिवारीले उत्कृष्ट प्रदर्शन गर्दै पाँचौ विकेटका लागि ६१ रनको साझेदारी गरेका थिए। स्टोक्सले ३२ बलमा ५० रन जोडे भने मनोज तिवारीले २३ बलमा अविजित ४० रन बनाए।

जवाफी ब्याटिङमा उत्रिएको पन्जाबले १९ ओभरमा लक्ष्य पुरा गरेको थियो। डेबिड मिल्लर र ग्लेन म्याक्सवेलले पाँचौ विकेटका लागि अविजित ७९ रनको साझेदारी गर्दै पन्जाबलाई जिततर्फ डोर्याएका थिए। ओपनर हसिम अम्लाले २८ रन बनाए भने मनन बोहरा र रिधिमान साहाले समान ९ रन जोडे। अक्षा पटेलले चौथो नम्बरमा ब्याटिङ गर्दै २२ बलमा २४ रन बनाए।

२० बलमा ४४ रन बनाएका ग्लेन म्याक्सवेल म्यान अफ द म्याच भए। उनले २ चौका र ४ छक्का प्रहार गरेका थिए। मिल्लरले २७ बलमा ३० रन बनाएका थिए।