राजकोट (एजेन्सी) – इन्डिएन प्रिमिएर लिग (आइपिएल) अन्तर्गत शुक्रबार राती भएको एकमात्र खेलमा कोलकाता नाइट राइडर्सले घरेलु टोली गुजरात लायन्सलाई १० विकेटले पराजित गरेको छ।

पहिलो ब्याटिङमा उत्रिएको गुजरात लायन्सले निर्धारित २० ओभरमा ४ विकेट गुमाउँदै १ सय ८४ रन जोडेको थियो। आइपिएलमा डेब्यु गरेका ओपनर जेसन रोय १४ रनमा आउट भएपछि आएका कप्तान सुरेश रैनाले अविजित ६८रन बनाएका थिए। उनले ५१ बल खेल्दै ७ चौका प्रहार गरेका थिए। कोलकाताले रैनाको २ क्याच छाड्नु भारी सावित भएको थियो।

गुजरातका लागि ब्रेन्डन मक्कुलमले २४ बलमा २ छक्का र ४ चौका सहित ३५ रन बनाए। दिनेश कार्तिकले इनिङ्सको अन्त्यतिर २५ बलमा ४७ रन जोडे। उनले ६ चौका र २ छक्का प्रहार गरेका थिए। कोलकाताका स्पिनर कुलदिप यादवले २ विकेट लिँदा ट्रेन्ट बोल्ट र पियुष चावलाले १/१ विकेट लिए।

जवाफि ब्याटिङमा उत्रिएका कोलकाताको लागि ओपनरद्वय क्रिस लिन र गौतम गम्भीरले ऐतिहासिक इनिङ्स खेल्दै टोलीलाई १० विकेटको जित दिलाए। १४.५ ओभरमै लक्ष्य प्राप्त गरेको कोलकाताका लागि कप्तान गम्भीरले ४८ बलमा ७६ रन बनाएका थिए भने क्रिस लिनले ४१ बलमा ९२ रन जोडे। गम्भीरले १२ चौका प्रहार गर्दा लिनले ६ चौका र ८ छक्का बनाएका थिए।

कोलकाता नाइट राइडर्सका क्रिस लिन म्यान अफ द म्याच घोषित भए।