बेलबारी (हाम्रो खेलकुद)– नाइट चेस क्लब काँकर भिट्टाले पिएलओ प्रथम पूर्वाञ्चल स्तरीय टि ट्वान्टी क्रिकेट प्रतियोगिताको उपाधि जितेको छ । सप्तरी ११ राजविराजलाई ५ विकेटले हराउँदै नाइट चेस पूर्वाञ्चल च्याम्पियन बनेको हो ।

७३ रनको लक्ष्य पछ्याएको नाइट चेसले १५.३ ओभरमा आवश्यक रन जोड्दै उपाधि जितेको थियो । त्यसअघि टस जितेर ब्याटिङ गरेको सप्तरीले १८.५ ओभरमा सबै विकेट गुमाएर ७२ रन बनाएको थियो । सप्तरीलाई सस्तैमा रोक्ने क्रममा नाइट चेसका विक्रम कार्कीले ४ विकेट लिएका थिए । विजेता नाइट चेसले उपाधिसहित ५१ हजार र सप्तरीले ३१ हजार रुपैयाँ प्राप्त गर्यो ।

नाइट चेसका सन्दीप ढुंगाना म्यान अफ दी सिरिज घोषित हुँदै ५ हजार १ सय प्राप्त गरे । होराइजन क्लब विराटनगरका मनोज मण्डल वेस्ट बलर र नाइट चेसका अंकित सुवेदी वेस्ट ब्याट्सम्यान चुनिएका थिए । मनोज र अंकितले समान ३ हजार १ सय पाए ।

राष्ट्रिय खेलकुद परिषद्का सदस्य सचिव केशवकुमार विष्टले विजेता, उपविजेता टोलीका खेलाडीलाई पुरस्कृत गरे । बेलबारी क्रिकेट क्लबको आयोजनामा चैत १६ देखि सुरु भएको प्रतियोगितामा पूर्वाञ्चलका १६ टोलीको सहभागिता थियो ।