काठमाडौं (हाम्रो खेलकुद) – नेक्सस कप यू १६ टि ट्वान्टी राष्ट्रिय क्रिकेट प्रतियोगिता बुधबार राजधानीमा सुरु हुने भएको छ । नेक्सस क्रिकेट एकेडेमीको आयोजनामा सुरु हुने प्रतियोगितामा सात प्रदेशका २८ टोलीको सहभागिता रहने मंगलबार आयोजित पत्रकार सम्मेलनमा एकेडेमीका अध्यक्ष भरतकुमार शाहीले जानकारी दिए ।

प्रतियोगितामा १६ वर्ष भन्दा मुनिका खेलाडीलाई मात्रै सहभागिता होस भनेर उमेर प्रमाणका लागि कक्षा आठको प्रमाणपत्र र बोन टेस्ट गरिने पनि शाहले बताए । १७ दिनसम्म चल्ने प्रतियोगिताका खेलहरु बुढानिलकण्ठ आवासिय माध्यमिक विद्यालयको खेल मैदान ‘ए’ र ‘बी’, ल्याब्रोटरी स्कुल कीर्तिपुर र त्रिवि क्रिकेट मैदान कीर्तिपुर गरी चारवटा खेल मैदानमा हुनेछ ।

सहभागि टोलीलाई चार समूहमा विभाजन गरिएको छ । लिग कम नकआउटका आधारमा हुने प्रतियोगिताको हरेक समूहको शीर्ष दुई टोली क्वार्टरफाइनलमा प्रवेश गर्नेछन् ।

प्रतियोगिताको विजेताले उपाधिसहित १ लाख ५० हजार रुपैयाँ र दोस्रो हुने टोलीले १ लाख रुपैयाँ प्राप्त गर्नेछन् । प्रतियोगिताको उत्कृष्ट खेलाडीले २० हजार र इमर्जिङ खेलाडीले १५ हजार प्राप्त गर्नेछ ।

त्यस्तै उत्कृष्ट ब्याट्सम्यान र बलरले समान १० हजार रुपैयाँ पाउनेछन् । प्रतियोगिताको उद्घाटन खेल बुधबार कर्णाली क्रिकेट क्लब कालिटो कार सानरेड काठमाडौंबीच बुढानिलकण्ड मैदानमा हुनेछ ।