काठमाडौं (हाम्रो खेलकुद) – राष्ट्रिय खेलकुद परिषद् (राखेप) का सदस्य सचिव केशवकुमार विष्टले खेलाडीले पाउनु पर्ने रकम निकासाका लागि अन्तर्राष्ट्रिय क्रिकेट परिषद् (आइसिसी) सँग पत्राचार गरेको जानकारी दिएका छन् । बंगादेशमा सुरु भएको एसिसी इमर्जिङ कप क्रिकेटमा भाग लिन जाने नेपाली टोलीलाई शनिबार विदाई गर्ने क्रममा सदस्य सचिव विष्टले उक्त जानकारी दिएका हुन् ।

विष्टले आइसिसीले बर्षको सुरुआतमा नेपाल क्रिकेट संघ (क्यान) माथि लगाइएको निलम्बन फुकुवा हुने विश्वास समेत व्यक्त गरे । विदाईका क्रममा नेपाली टोलीका प्रशिक्षक जगत टमाटाले नेपालको लक्ष्य कम्तीमा पनि दोस्रो चरण पुग्ने रहेको दोहोरोए ।

‘टिममा अधिकांश नयाँ र प्रतिभावान युवा खेलाडीहरुको बाहुल्यता’ मुख्य प्रशिक्षक टमाटाले भने, ‘यो प्रतियोगिता नयाँ खेलाडीहरुका लागि प्लेट फर्म हो । यस्तो मौकालाई युवा खेलाडीहरुले सदुपयोग गर्न सक्छु पर्दछ ।’ प्रशिक्षक टमाटाले टोली सन्तुलित रहेको र विकेट कन्डिसन हेरेर प्लेइङ टोली तयार पार्ने बताए । उनले नयाँ खेलाडीहरुले डेब्युको अवसर पाउने संकेत पनि गरे ।

टोलीका कप्तान ज्ञानेन्द्र मल्लले टेष्ट मान्यताप्राप्त राष्ट्र पाकिस्तान र बंगलादेशसँग खेल्न पाउनु युवा खेलाडीहरुको लागि महत्वपूर्ण अवसर रहेको बताए । ‘नेपाली टिममा नयाँ प्रतिभावान खेलाडीहरु आइरहेको छन्, बेञ्च बलियो बनाउनको लागि उनीहरुको प्लेटफर्म नेपालका लागि फाइदा र नेपाली क्रिकेटका लागि फलदायी हुनेछ ’ उनले भने, ‘खेल्ने त उपाधिकै लागि हो तर, हामी उपाधि जित्न नसकेपनि राम्रो भन्दा राम्रो क्रिकेट खेल्ने प्रयास गर्नेछौं ।’

नेपालले मंगलबार टेष्ट मान्यता प्राप्त पाकिस्तानको यु–२३ टोलीसँग खल्दै प्रतियोगिताको सुरुवात गर्नेछ । यस्तै दोस्रो खेलमा आयोजक बंगलादेशसँग चैत १५ गते र समूह चरणको अन्तिम खेलमा हङकङसँग चैत १७ गते खेल्नेछ । नियमित कप्तान पारस खड्कासहित शक्ति गौचन, बसन्त रेग्मी र सोमपाल कामीलाई भने यसपटकको भ्रमणमा आराम दिइएको छ ।

पूर्ण टोलि:

ज्ञानेन्द्र मल्ल (कप्तान), शरद भेषावकर (उपकप्तान), विनोद भण्डारी , सागर पुन , मेहबुब अलाम , दिपेन्द्र सिंह ऐरी , सुनिल धमला , सन्दिप लामिछाने, आरिफ शेख , आसिफ शेख , दिलप नाथ , अभिनाश कर्ण , सुसान भारि, दिपेश श्रेष्ठ र भुवन कार्की ।