नोएडा (एजेन्सी)– आयरल्यान्डविरुद्धको पाँचौ तथा अन्तिम एक दिवसीय क्रिकेटमा शुक्रबार ७ विकेटले विजयी हुँदै अफगानिस्तानले ३–२ ले श्रृखंला जितेको छ । पहिलो दुई खेल जितेको अफगानिस्ताले त्यसपछिका लगातार दुई खेल हारेको थियो । निर्णायक अन्तिम खेलमा अफगानिस्तानले बाजी मारेको हो ।

भारतको ग्रेटर नोएडामा २ सय ३० रनको लक्ष्य पछ्याएको अफगानिस्तानले रहमत शाहको शतकको मद्दतमा आवश्यक रन जोडेको थियो । टोलीले २५ रनमा दुवै ओपनर गुमाएको थियो । तर, रहमतले अविजित १ सय ८ रन बनाएपछि ३ विकेट गुमाएको अफगानिस्तानले ८ बल अघि नै लक्ष्य पुरा गरेको थियो ।

सम्हालिएको इनिङ्स खेलेका रहमतले १ सय ६४ बल खेल्दै १० चौका र १ छक्का प्रहार गरेका थिए । उनलाई चौथो विकेटमा राम्रो साथ दिएका समिउल्लाह शेन्वारीले अविजित ६२ रन जोडे । रहमत र समिउल्लाहले १ सय ३३ रनको महत्वपूर्ण साझेदारी गरेका थिए ।

त्यसअघि टस जितेर पहिले ब्याटिङ गरेका आयरल्यान्डले ४८.१ ओभरमा सबै विकेट गुमाउँदै २ सय २९ रन बनाएको थियो । ३५औ ओभरको तेस्रो बलमा १ सय ७० रनको अवस्थामा चौथो विकेट पतन भएको आयरल्यान्डले त्यसपछि ५९ रन जोड्दा थप ६ विकेट गुमाएको थियो ।

ओपनर पौल स्ट्रलिङले अर्धशतक पुरा गरे । उनले ५१ रन , अर्का ओपनर एडी जोइसले ४२, ब्याट्सम्यान विलियन पोटरफिल्ड र ओब्राइनले समान ३४ रन बनाएका थिए ।

तल्लो क्रमका जोर्ज डकरवेलको २१ रन जोडेपछि आयरल्यान्डले २ सय २९ बनाउन सकेको थियो । अफगानिस्तानका युवा स्टार राशिद खानले १० ओभरमा २९ रनमात्र दिदै ४ विकेट लिए । त्यस्तै फरिद अहमदले ३ र दव्लत जद्रानले २ विकेट लिए ।