काठमाडाैं (हाम्रो खेलकुद) – सगरमाथा सिमेण्ट धनगढी प्रिमियर लिग (डिपिएल) निर्धारित मितीभन्दा २२ दिन पर सर्ने भएको छ। चैत ५ गतेबाट सुरु हुने भनिएको डिपिएल त्यसै समयमा एसियन क्रिकेट काउन्सिल (एससिसी)ले एसीसी इमर्जिङ टिम्स कप आयोजना गर्ने भएपछि सर्ने भएको हो।

आयोजक धनगढी क्रिकेट एकेडेमीले मंगलबार जारी गरेको विज्ञप्तिमा डिपिएल अब चैत्र २७ गतेदेखि वैशाख ९ गतेसम्म हुने जनाइएको छ। राष्ट्रिय क्रिकेटको बृहत्तर विकासलाई ध्यानमा राख्दै प्रतियोगिता पछि सारिएको विज्ञप्तिमा जनाइएको छ।

‘हामीले पूर्वनिर्धारित समयानुसार आयोजनाको ९० प्रतिशत काम सकाइसकेका थियौं,’ आयोजक धनगढी क्रिकेट एकेडेमीका अध्यक्ष सुवास शाहीले भने, ‘तर, अन्तर्राष्ट्रिय खेलमा खेलाडीहरूको एक्सपोजरलाई मध्यनजर राख्दै प्रतियोगिता पछाडि धकेल्ने निर्णयमा पुगेका हौं।’ उनका अनुसार इमर्जिङ कप र डिपिएल दुबै नेपाली क्रिकेटका लागि दुबै महत्वपुर्ण छन्। ‘डिपिएलले घरेलु क्रिकेटमा व्यवसायिकताको प्रवर्द्धन गर्दै नेपाली क्रिकेटलाई नयाँ उचाइमा पुर्याएको छ।’

डिपिएलमा देशभरिका विभिन्न ६ वटा टिमका सहरहरू सहभागी हुँदैछन्। काठमाडौं, विराटनगर, भैरहवा, धनगढी, अत्तरिया र कञ्चनपुर सहभागी टिम हुन्।