प्रकाश तिमल्सिना
काठमाडौं – केन्याविरुद्ध शनिबार कीर्तिपुरमा हुने आइसिसी विश्व क्रिकेट लिग (डब्लुसिएल) च्याम्पियनसिपमा कप्तान पारस खड्का खेल्ने नखेल्ने अझै निश्चित भएको छैन । पेटको समस्याका कारण अन्तिम तयारीका लागि भारत भ्रमण जान नसकेका पारसले चार दिन अघिमात्र प्रशिक्षण थालेका थिए ।

‘अभ्यास सुरु गरिसकेको छु । खासै अप्ठेरो केही छैन ’ उनले भने, ‘तर, म खेल्ने नखेल्ने शुक्रबार हुने टिम मिटिङमा या त शनिबार विहान मात्र थाहा हुनेछ । ’ पारसले आफु नखेलेपनि टोलीमा एक सय एक विकल्प रहेको बताए । ‘अन्तिम निर्णय लिन बाँकी छ । तर म नखेल्दा पनि हामीसँग धेरै विकल्प छ । सबै खेलाडी फर्ममा छन्’ उनले थपे, ‘त्यसले खासै चिन्ता लिनु पर्ने विषय छैन । अर्को हामी घरेलु मैदानमा खेल्दैछौं, वातावरणले पनि हामीलाई पक्कै साथ दिनेछ ।’

उनले यसपटकको तयारीमा पनि सन्तोषजनक रहेको सुनाए । उनले भने ‘तयारीमा यसपटक कुनै कमै भए जस्तो लाग्दैन । अब तयारी अनुसार मैदानमा प्रदर्शन गर्नु पर्ने हुन्छ ।’

केन्या राम्रो टोली भएकाले प्रतिस्पर्धा सहज नहुने पारस अनुमान लगाउँछन् । ‘च्याम्पियनसिपमा भएका सबै टोली उत्तिकै बलिया छन् । कसैले हराउन नसकेको नेदरल्यान्ड्सलाई हामीले उनीहरुकै मैदानमा हराएर आएका छौं’ उनले भने, ‘केन्यालाई हराउन हामी राम्रै खेल्नुपर्ने हुन्छ । केन्यासँगको खेल पक्कै सहज हुने छैन ।’

आठ राष्ट्रको सहभागिता रहेको डब्लुसिएल च्याम्पियनसिपमा ८ खेलमा ६ अंकसहित नेपाल अंक तालिकाको छैटौं स्थानमा रहेको छ । डब्लुसिएल दुई बर्षपछि आयोजना हुने विश्व कप क्रिकेटको छनोटको माध्यम पनि रहेकोले यसलाई सहभागी सबैले महत्वका साथ हेरेका छन् । अंक तालिकाको शीर्ष ४ मा रहने टोली तथा आइसिसी एक दिवसिय च्याम्पियनसिपको पुछारमा रहेका चार टोलीबीच अर्को बर्ष विश्व कप छनोट हुनेछ । त्यसैले पारस डब्लुसिएलका बाँकी सबै खेल महत्वपूर्ण रहेको बताउँछन् । ‘हाम्रा लागि बाँकी सबै खेल महत्वपूर्ण छन् ’ पारसले भने,‘त्यसमा पनि यो सुरुका यी दुई खेल झनै बढी महत्वपूर्ण छन् । यी दुई खेलका नतिजाले हामी कहाँ सम्म पुग्न सक्छौं भन्ने अनुमान गर्न सकिन्छ । अहिलेको परिस्थिति हेर्ने हो भने हामीले हरेक खेल राम्रो खेल्नुको विकल्प नै छैन । रिल्याक्स हुने अवस्था पटक्कै छैन ।’

डब्लूसिएल च्याम्पियनसिप अंक तालिकाको पुछारमा रहने चार टोली डिभिजन २ मा घटुवा हुनेछन् । यद्दपी त्यो अवस्थामा पनि विश्व कप छनोट खेल्ने अवसर भने बाँकी नै रहनेछ । तर, त्यसका लागि डिभिजन २ मा घटुवा हुने ४ टोली र डिभिजन ३ का फाइनल पुग्ने टोलीबीच पुनः राउन्ड रोविनका आधारमा प्रतिस्पर्धा हुनेछ । त्यो राउन्ड रोविनमा शीर्ष दुईमा पर्ने टोलीले विश्व कप छनोटमा प्रवेश पाउनेछन् । १० खेलपछि नेदरल्यान्ड्स १६ अंकसहित डब्लुसिएल च्याम्पियनसिप अंकतालिकाको शीर्षस्थानमा छ । ८ खेलमा पपुवा न्युगिनीको १२, १० खेलमा हङकङको ११ अंक छ । बाँकी ८ खेल खेलेका टोली मध्ये स्कटल्यान्डको ११, केन्याको ८, नामिबिया र संयुक्त अरब इमिरेट्सको समान २ अंक छ ।

केन्याविरुद्ध पारसको कप्तानीमा रहेको टोलीमा सुनिल धमला र दिपेन्द्र सिंह ऐरीले पहिलो पटक मौका पाएका छन् । त्यस्तै अलरान्डर महबुब आलमले पुनरागमन गरेको राष्ट्रिय टोलीका अन्य सदस्यमा उपकप्तान ज्ञानेन्द्र मल्ल, शरद भेषावकर,शक्ति गौचन, बसन्त रेग्मी, सोमपाल कामी, सागर पुन, भुवन कार्की, विनोद भण्डारी,करण केसी, सन्दिप लामिछाने र आरिफ शेख छन् । नेपाल र केन्याबीच दोस्रो खेल सोमबार हुनेछ ।