एजेन्सी – भारत र अष्ट्रेलियाबीच जारी दोश्रो टेष्ट अन्तर्गत चौथो दिनमै भारतले अष्ट्रेलियाविरुद्ध ७५ रनको जित दर्ता गरेको छ। पहिलो टेष्टमा ३३३ रनको हार व्येहोरेको भारतले यस खेलमा पनि सुरुवात राम्रो गर्न सकेको थिएन। तर, अन्तिम दुई दिनमा राम्रो प्रदर्शन गरेपछि भारतले शृंखला १-१को बराबरीमा ल्यायो।

चौथो दिनको सुरुवातमा २१३/४को स्थितिमा रहेको भारतले चेतेश्वर पुजाराको ९२ र अजिंक्या रहानेको ५२ रनको मद्दतले दोश्रो इनिङमा २७४ रन बनायो। यससंगै अष्ट्रेलियाले जितका लागि १८८ रनको लक्ष्य पाएको थियो। अष्ट्रेलियाका लागि तेज बलर जोश हेजलवुडले ६ विकेट लिएका थिए भने स्टिभ ओ’किफ र मिचेल स्टार्कले २/२ विकेट लिए।

लगातार दुई टेष्टमा जित दर्ता गर्ने लक्ष्य लिएर ब्याटिङमा उत्रेको अष्ट्रेलियाले नियमित विकेट गुमाएपछि जितबाट टाढा हुँदै गएको थियो। अष्ट्रेलियाले जम्मा ११२ रन जोड्दै आफ्नो सबै विकेट गुमेको थियो। उसका लागि कप्तान स्टिभ स्मिथले २८ र पिटर ह्याण्डस्कम्बले २४ रनबनाउनु बाहेक अन्य कसैले २० रन पार गर्न सकेनन्।

भारतका लागि रविचन्द्रन आश्विनले ६ विकेट र उमेश यादवले २ विकेट लिए। इशान्त शर्मा र रबिन्द्र जडेजाको नाममा पनि १/१ विकेट रह्यो। खेलको म्यान अफ द म्याच भारतीय ओपनर लोकेश राहुल भए। उनले पहिलो इनिङमा ९० र दोश्रोमा ५२ रन बनाउदै उत्कृष्ट ब्याटिङ गरेका थिए।