इटहरी (हाम्रो खेलकुद) – इटहरीमा जारी महिला राष्ट्रिय क्रिकेट प्रतियाेगिताकाे उपाधिको लागी सुदूरपश्चिमाञ्चल  र सशस्त्र प्रहरी बल (एपीएफ) भिड्ने भएका छन । सोमबार डिभिएम ग्लोबल स्कुलको क्रिकेट मैदानमा सम्पन्न पहिलो सेमिफाइनलमा सुदूरपश्चिमाञ्चलले पश्चिमाञ्चललार्इ ७ विकेटले पराजित गर्दै फाइनल प्रवेश गरेको थियो। दिनकै दोस्रो खेलमा पूर्वाञ्चललार्इ ७ रनले पराजित गर्दै एपीएफले पनि फाइनलमा स्थान पक्का गरेको हो ।

टस हारेर पहिले बलिङ गरेको सुदूरपश्चिमाञ्चलले पश्चिमाञ्चललाई १९.२ अाेभरमा ८१ रनमा रोकेको थियो । सुदूरपश्चिमाञ्चलकी कबिता जाेशीले सर्वाधिक ३ विकेट लिइन् भने रेखा रावले २ तथा सुमन विष्ट, सम्झना खड्का र अन्जली चन्दले समान १ विकेट लिए। पश्चिमाञ्चलकी वर्षा रानाले सर्वाधिक २७ रन जाेडिन् भने सरस्वती पुनले १३ रनको योगदान दिइन । दोस्रो ब्याटिङ गरेको सुदूरपश्चिमाञ्चलले रेखा रावलको नटअाउट ३६ रनको योगदान संगै १७ अाेभर ४ बलमा ३ विकेट गुमाउँदै लक्ष्य पुरा गर्‍यो ।

त्यस्तै दोस्रो सेमिफाइनलमा टस हारेर पहिलो ब्याटिङ गरेको एपिएफले पूर्वाञ्चलसामु ६६ रनको लक्ष्य प्रस्तुत गरेपनि कसिलो बलिङको मद्दतले ७ रनकाे जित निकाल्दै फाइनलमा स्थान पक्का गर्‍यो । निर्धारित २० ओभरमा ९ विकेट गुमाउदै  एपीएफले ६६ रन बनाउदा करूणा भण्डारीले २२ रन जोडिन भने पूर्वाञ्चलकी सरस्वती चाैधरी तथा सवनम रार्इले समान ३/३ विकेट लिए ।

जवाफमा पूर्वाञ्चलले १९ अाेभर २ बलमा ५९ रन बनाउदै सबै विकेट गुमायो । पूर्वाञ्चलकी राेमा थापाले १८ र काजाेल श्रेष्ठले १४ रन बनाइन। एपीएफकी सिता रानामगरले ३ तथा रितु कनाैजियाले २ विकेट लिइन।