भारतविरुद्ध अष्ट्रेलियाको बलियो प्रदर्शन जारी

एजेन्सी – भारत र अष्ट्रेलियाबीच बेंगलोरमा भइरहेको दोश्रो टेष्टको दोश्रो दिन पनि अष्ट्रेलियाले आफ्नो बलियो प्रदर्शनलाइ जारी राखेको छ। दोश्रो दिनको खेल ४०/०को स्थितिमा सुरुवात गरेको अष्ट्रेलिया दोश्रो दिनको खेल समाप्त हुँदा २३७/६ को बलियो स्थितिमा रहेको छ।

दिनको पहिलो विकेटका रुपमा ओपनर डेबिड वार्नर आउट भएका थिए। आश्विनको बलमा बोल्ड आउट हुनु अघि उनले ३३ रन बनाए। अष्ट्रेलियाका कप्तान स्टिभ स्मिथले ८ रन जोडे भने ओपनर म्याट रेन्सले ६० रनको सम्हालिएको इनिङ खेले। पिटर ह्यान्ड्सकम्बले १६ रन जोड्दा मिचेल मार्स खाता नखोली पेभेलियन फर्किए।

दोश्रो दिनको खेलको अन्त्य नजिकिदै गर्दा उत्कृष्ट लयमा देखिएका सन मार्शपनि पेभेलियन फर्किए। चौथो नम्बरमा ब्याटिङ गर्न आएका मार्शले १९७ बलमा ४ चौकाको मद्दतले सर्वाधिक ६६ रन बनाएका थिए। दिनको खेल समापन हुँदा माथ्यु वेड २५ रनमा र मिचेल स्टार्क १४ रनमा अविजित छन्। भारतका लागि रबिन्द्र जडेजाले ३ विकेट लिए भने इशान्त शर्मा, रविचन्द्रन आश्विन र उमेश यादवले समान १/१ विकेट लिए।