काठमाडौं ( हाम्रो खेलकुद)- दि कोर क्याम्प सिनियर टिम अभ्यास म्याचमा नेपाल रातोले नेपाल पहेंलोलाई ८ विकेटले हराएको छ।

जितको लागि १ सय ५९ रनको सहज लक्ष्य नेपाल रातोले २९ .४ ओभरमा २ विकेटको नोक्सानीमा पूरा गर्यो।

ओपनर त्रितराज दास र अर्जुन साउदले राम्रो सुरय दिलाए। उनीहरुले पहिलो विकेटको लागि ८५ रनको साझेदारी गर्दै जितलाई सहज बनाए। त्रितराज २९ रनमा आउट भए।

शुभ कंशकार ३० रनमा आउट भए। अर्जुनले ९६ बल खेल्दै १२ चौका र १ छकमका सहित अविजित ८६ रन जोड्दै टिमलाई ८ विकेटको रवाफिलो जित दिलाए। बलिङमा अविनाश बोहरा र अजय चौहानले १/१ विकेट लिए।

त्यसअघि माथिल्लो मुलपानी मैदानमा टस जितेर नेपाल रातोले फिल्डिङ रोज्यो। पहिले ब्याटिङ गरेको नेपाल पहेंलोले निर्धारित ४७ ओभरको खेलमा ४०.१ ओभरमा अल आउट हुँदै मात्र १ सय ५८ रन बनायो।

नेपाल पहेंलो ब्याटिङमा चुक्यो। ब्याटिङमा अत्यन्त फितलो प्रदर्शन गर्दा २५ रन बनाउँदा ४ विकेट गुमाइसकेको थियो।

दीपेन्द्र सिंह ऐरी मात्र क्रिजमा टिके। उनी एक्लैले इनिङ्स सम्हाले। उनलाई अन्य कुनै पनि खेलाडीले साथ समेत दिन सकेनन्।

चौथो क्रमका दीपेन्द्रले १ सय ८ बल खेल्दै १० चौका सहित अविजित ९० रन बनाए। रूपेश कुमार सिंहले १६ रन बनाए। यी दुई बाहेक अन्य कुनै पनि खेलाडीले दोहोरो रन छुन सकेनन्।

नेपाल पहेंलोलाई १ सय ५८ रनना समेट्न नन्दन यादवले ३ तथा प्रतिश जिसीले २ विकेट लिए।