काठमाडौं (हाम्रो खेलकुद) – इन्डियन प्रिमियर लिग (आइपिएल) अन्तर्गत लिग चरणको ४७ औं खेलमा गुजरात टाइटन्सले राजस्थान रोयल्सलाई २ सय १० रनको बलियो लक्ष्य प्रस्तुत गरेको छ ।

टस हारेपछि ब्याटिङको निम्तो पाएको गुजरातले २० ओभरमा ३ विकेट गुमाएर २ सय ९ रनको योगफल खडा गर्यो । ओपनर तथा कप्तान शुभमन गिलले सर्वाधिक ८४ रनको योगदान दिए । उनले ५० बलमा ८४ रन जोड्ने क्रममा ५ चौका र ४ छक्का प्रहार गरे ।

गिल र साई सुदर्शनले पहिलो विकेटका लागि ९३ रनको साझेदारी गरेका थिए । ११ औं ओभरमा साइ आउट भएपछि साझेदारी तोडिएको थियो । उनले ३० बलमा ४ चौका र १ छक्का सहित ३९ रन जोडे ।

गिल र बटलरबीच दोस्रो विकेटका लागि ७४ रनको साझेदारी भयो । बटलर २६ बलमा ३ चौका र ४ छक्कासहित ५० रनमा नटआउट रहे । वासिंगटन सुन्दरले ८ बलमा १३ रन जोडे । राहुल तेवाटिया ९ रनमा आउट हुँदा शाहरुख खानले नटआउट ५ रन बनाए ।

राजस्थानका महिश थिक्सानाले २ विकेट तथा जोफ्रा आर्चर र सन्दीप शर्माले १-१ विकेट लिए ।

गुजरात ८ खेलमा १२ अंक जोड्दै दोस्रो स्थानमा छ । यो खेल जिते टोली शीर्षस्थानमा उक्लनेछ । ९ खेलमा ४ अंक जोड्दै नवौं स्थानमा रहेको राजस्थानको प्लेअफ पुग्ने सम्भवना कमजोर छ ।