काठमाडौं (हाम्रो खेलकुद)– क्रिकेट प्रशिक्षक राजु बस्न्यातले दक्षिण कोरियाली क्रिकेटको मुख्य प्रशिक्षकको जिम्मेवारी पाउनुलाई नेपाली क्रिकेटकै सफलतासँग जोडेर हेरेका छन् । ‘सामान्य अर्थमा हेर्दा यो मेरो सफलता जस्तो देखिन सक्छ । तर मैले यसलाई त्यसअर्थमा मात्र बुझेको छैन’ बस्न्यातले हाम्रो खेलकुदसँग भने,‘मैले कोरियामा राम्रो गर्न सके भने हाम्रो प्रशिक्षकहरुका लागि नयाँ ढोका खुल्न सक्छ । यसरी हाम्रो जनशक्तिको कदर भयो भने समग्रमा त्यो नेपाली क्रिकेटकै लागि फाइदा हुन्छ भन्ने मेरो विश्वास छ । ’

तीन दिनअघि मात्र बस्न्यातलाई कोरिया क्रिकेट संघले मुख्य प्रशिक्षकका रुपमा अनुबन्धन गरेको थियो । उनी साता दस दिनपछि कोरिया जाने तयारीमा जुटिसकेको छन् । एक बर्षे सम्झौता गरेका बस्न्यातले त्यहाँको पुरुष÷महिला दुवै क्रिकेटको प्रशिक्षण सम्हाल्नु पर्ने सम्झौता पत्रमा उल्लेख रहेको बताएका छन् ।

उनले नयाँ जिम्मेवारीलाई व्यक्तिगत रुपमा जति उपलब्धीमा मानेका छन् त्यत्तिनै चुनौति पनि । ‘धेरै जनाबाट छनोट गरेकाले पक्कै पनि उपलब्धी हो’ उनले थपे, ‘उनीहरुले जुन खालको मातदण्ड राखेका थिए । ती सबै मापदण्ड मैले पुरा गरिसकेको थिए । अवसर पाए अब केही गरेर देखाउने चुनौतिसँगै जोडेर आएको छ ।’

नेपालका लागि वैदेशिक रोजगारीमा आकर्षक गन्तव्यस्थल रहेको कोरियामा बस्न्यात भने क्रिकेट संघको सम्झौतामा सम्मानजक अवस्थामा त्यहाँ पुग्दैछन् । उनले मासिक ५० लाख योनमा सम्झौता गरेको बताएका छन् । त्यसबाहेक एक बर्षमा तीन पटक २० लाख योन को भत्ता पाउनेछन् । खुसी हुँदै बस्न्यातले भने, ‘नेपालीका लागि ६ लाख रुपैयाँ भन्दा बढी मासिक पारिश्रमिक भनेको धेरै राम्रो हो ।’

सन् २००३ देखि झन्डै एक दशक नेपाली राष्ट्रिय टोलीका सदस्य रहेका बस्न्यातले यू १६ र महिला राष्ट्रिय टोलीको मुख्य प्रशिक्षक पनि रहिसकेका छन् । कोरिया क्रिकेट संघले मुख्य प्रशिक्षकका लागि लेभल टु कोर्स, एपिएफ क्लब, महिला राष्ट्रिय टोलीलाई प्रशिक्षण गरेको अनुभवलाई मापदण्डमा राखेको थियो । लेभल थ्री कोर्स गरेका बस्न्यातले कोरियाले तोकेको सबै मापदण्ड पुरा गरिसकेका थिए । उनले थपे, ‘उनीहरुले तोकेको मापदण्ड भन्दा मेरो अनुभव अझै बढी देखिन्छ । मौका पाउछु भन्ने कता कता आशा थियो । मौका पाएको छु, अब आफुलाई प्रमाणित गर्नुछ ।’

कोरियामा क्रिकेट त्यति विकास भइसकेको छैन । बस्न्यातले भने, ‘त्यहाँको क्रिकेट विकास हुने क्रममा रहेको छ । कुनै पनि खेलको विकास हुन लामो समय लाग्छ । अब त्यहाँ पुगेर संघसँग मिलेर योजना बनाएर अघि बढ्ने प्रयास गर्नेछु । आफ्नो जिम्मेवारीलाई इमान्दारितापूर्वक पुरा गर्नेछु ।’