काठमाडौं(हाम्रो खेलकुद) – ललितनारायण राजवंशीको कीर्तिमानी बलिङमा नेपाल पुलिस क्लबले प्रधानमन्त्री(पिएम) कप पुरुष एकदिवसीय राष्ट्रिय क्रिकेट प्रतियोगितामा लगातार आठौं जित हासिल गरेको छ ।

पुलिसले मंगलवार कर्णाली प्रदेशलाई ४४ रनले पराजित गर्यो । १ सय ४८ रनको लक्ष्य पछ्याएको कर्णाली २४ ओभरमा १ सय ३ रनमा समेटियो ।

कर्णालीका लागि ओपनर रविन्द्र जंग शाहीले ३२ बलमा ७ चौथो र २ छक्कासहित सर्वाधिक ४९ रन जोडे । मध्यक्रमका ब्याटर अर्जुन घर्तीले ४२ बलमा ३ चौका र १ छक्काको सहयोगमा ३० रन बनाए । कर्णालीका ३ ब्याटरले रनको खाता नै खोल्न सकेनन् ।

कर्णालीको इनिङ धराशायी बनाउने क्रममा ललितले ९ ओभरमा ४१ रन खर्चिएका ललितले ६ विकेट लिए । यसका साथै ललित पिएम कपको इतिहासमा १ सय विकेट पूरा गर्ने पहिलो बलर बनेका छन् ।

सन् २०१७ बाट पिएम सुरु भएयता ललितले ४० इनिङमा यो सफलता प्राप्त गरेका हुन् । पिएम कपमा मंगलवार कर्णाली प्रदेशविरुद्ध १६औं ओभरको अन्तिम बलमा कप्तान दिवान पुनको विकेट लिंदै उनले सयौं विकेट पूरा गरेका हुन् ।

पिएम कपको इतिहासमा त्रिभुवन आर्मी क्लबका शाहब आलम ९९ विकेटका साथ दोस्रो स्थानमा छन् । सुदूरपश्चिम प्रदेशका शेर मल्ल ६९ विकेटका साथ तेस्रो स्थानमा छन् ।

ललित जारी पिएम कपमा पनि सर्वाधिक विकेट लिने खेलाडीको शीर्ष स्थानमा छन् । उनले ८ खेलमा ३६ विकेट लिइसकेका छन् । सुदूरपश्चिमका सागर ढकालको नाममा २ तथा करण केसीको नाममा १ विकेट रह्यो ।

त्यसअघि दाङ लमहीको देउखुरी क्रिकेट मैदानमा त्यसअघि टस हारेर पहिले ब्याटिङको निम्ता पाएकाे पुलिसले ४८ ओभरमा अल आउट हुदै १ सय ४७ रन बनाएको थियो।

पुलिसका‌‌ लागि अर्जुन साउद, दीलिप नाथ, सागर ढकाल बाहेक कुनै पनि ब्याटर चलेनन् । ओपनर अर्जुनले ६० बलमा ४ चौका र १ छक्काका साथ ३६ रन बनाए । ५९ बल‌ खेलेका दीलिपले २ चौकासहित ३४ रन बनाए ।

सागर २८ बलमा १ चौकासहित २२ रनमा नटआउट रहे। श्रवण यादवले ११ रन बनाए भने अन्य कुनैपनि ब्याटरले दोहोरो अंकमा रन बनाउन सकेनन् ।
अर्का ओपनर कुशल भुर्तेलले १ रन जोडे भने कप्तान दीपेन्द्र सिंह ऐरीले खाता खोल्न सकेनन् ।

कर्णालीका अनुज चनारा र दिवान पुनले किफायती बलिङ गरे। अनुजले १० ओभरमा २ मेडन राखेर २९ खर्चदै ४ विकेट लिए । दिवानले १० ओभरमा १ मेडनसहित २१ रन खर्चेर ३ विकेट लिए । दीनेश अधिकारी, दीपेन्द्र राउत र सुनिल धमलाले समान १ विकेट लिए ।

अपराजित पुलिस १६ अंकसहित फाइनलमा पुगेको छ । पुलिस लिग चरणको अन्तिम खेल बिहीवार १४ अंकसहित दोस्रो स्थानको त्रिभुवन आर्मी क्लबसँग खेल्नेछ।

८ खेलमा एपिएफ १२ अंकसहित तेस्रो स्थानमा छ। पुलिस फाइनल पुग्ने पहिलो टोली बनेको छ। आर्मी र एपिएफ मध्ये एक टोली फाइनलमा पुग्नेछ।

कर्णालीले ९ खेलमा ४ जित र ५ हार सहित पाँचौ स्थानमा रहेर पिएम कपको अन्त्य गरेको छ।