काठमाडौं (हाम्रो खेलकुद)- प्रधानमन्त्री कप एकदिवसीय राष्ट्रिय पुरुष क्रिकेट प्रतियोगितामा आज मधेशसँगको खेलमा टाई भएपछिको सुपर ओभरमा गण्डकी प्रदेश विजयी भएको छ।

सुपर ओभरमा गण्डकीले २ विकेट गुमाएर २२ रन बनाएको थियो। जवाफमा मधेशले कुनै विकेट नगुमाई‌ ९ रन मात्र बनाउन सक्यो ।

‘यसरी भयो टाई’

जारी प्रतियोगितामा सुपर ओभर भएको यो पहिलो खेल यो पहिलो बराबरी नतिजा हो। गण्डकीका अर्जुन कुमालको शतक प्रहार गरेपछि गण्डकी टाइ गर्न सफल भएको थियो ।

जितको लागि २ सय ४७ रनको लक्ष्य पछ्याएको गण्डकी १ बल बाकी छँदा अल आउट हुँदै २ सय ४६ रन समेटियो।

खराब सुरुवात गरेको गण्डकीले १६ रन जोड्दा ३ विकेट गुमायो। विशाल पटेलले सुरुवाती ३ विकेट लिए। उनले ओपनर मुस्कान थापालाई १ रनमा तथा दीपक डुम्रे र रोहित चन्दलाई विना कुनै रन पबिलियनको बाटो देखाए।

त्यसपछि अर्जुनले इनिङस सम्हाले। उनलाई दीनेश बुढामगरले साथ दिए। यी दुई मिलेर चौथो विकेटको लागि १ सय १० रनको साझेदारी गरे। ३४ रन बनाएर दीनेश आउट भएपछि अन्य खेलाडी क्रिजमा टिक्न सकेनन्। निरन्तर अन्तरालमा विकेट झर्यो।

क्रिजमा जमेका अर्जुनले १ सय ३३ बलमा १० चौका र १ छक्का सहित शतक प्रहार गरे। उनी १ सय ६ रन बनाएर रञ्जित कुमारको बलमा आउट भए। आठौं विकेटको रुपमा अर्जुन आउट हुँदा गण्डकीले १ सय ९४ रन बनाएको थियो।

त्यसपछि कप्तान विपिन खत्री र सुदीप अर्यालले नवौं विकेटको लागि ४५ रनको साझेदारी गरे। अन्तिम ६ बलमा ९ रन जरुरी हुँदा विपिन अन्तिम ओभरको पहिलो बलमा विशाल पटेलको एलबिडब्लु धरापमा परे।

चौथो बलमा सुदीपले चौका प्रहार गर्दै टोलीलाई जिततर्फ अग्रसर बनाएका थिए। पाँचौं बलमा सुदीपले १ रन बनाए। यसपछि अन्तिम बलमा जितको लागि गण्डकीलाई २ रन आवश्यक थियो।

बलर विशाल पटेलले वाइड बल फाले। वाइड बलमा सन्दीप पराजुली रन आउट हुन पुगे। वाइडबाट प्राप्त १ रनले खेल टाइ भयो। यो बलमा सन्दीप रन आउट नभएको भए अन्तिम १ बलमा १ रन जोड्न सकेको भए गण्डकीले जित हात पार्ने थियो।

तर यो मौका गण्डकीले चुकाएको छ। बलिङमा विशाल पटेलले ८ ओभर ५ बलमा १ मेडन सहित ५२ रन खर्चेर ४ विकेट लिए।

त्यसअघि टस जितेर पहिले ब्याटिङ गरेको मधेश प्रदेशले ५० ओभरमा ७ विकेटको नोक्सानीमा २ सय ४६ रनको योगफल खडा गर्यो।

कमजोर सुरुवात गरेको मधेशले १७ रन बनाउँदा २ विकेट गुमाएको थियो। ७ रन बनाएका मयान यादव अमृत गुरुङद्वारा कट एण्ड बोल्ड भए। कप्तान अनिल शाह ३ रनमा विपिन खत्रीको बलमा आउट भए।

तर त्यसपछि ओपनर रोहन विके र हरिशंकर शाहले तेस्रो विकेटको लागि शतकीय साझेदारी गरे। दुवैले अर्धशतक प्रहार गरे।

रोहन ९८ बल खेलेर ६ चौका र ३ छक्का सहित ६४ रन जोडेर आउट भए। हरिशंकर ५१ रन बनाएर रन आउट हुन पुगे। यसपछि छैटौं क्रमका ब्याटर रुपेश सिंगले मात्र ३२ बल खेलेर ४ चौका र ३ छक्का सहित अविजित ५१ रन बनाए।

बलिङमा विपिन खत्री र कमल परियारले समान २, अमृत गुरूङ र सन्दीप पराजुलीले समान १ विकेट लिए।
गण्डकीले २ जित र ७ हारमा ४ अंकमा प्रतियोगिता सकाएको छ। ७ खेलमा मधेशले ४ अंक बनाएको छ।

• टाईपछि सुपर ओभरमा गण्डकी विजयी भएको थियो हुनुपर्नेमा अन्यथा भएकोले सच्याइएको छ।-सम्पादक