इन्डियन प्रिमियर लिग (आइपिएल) का टोलीहरु अक्सनका दौरान स्टार खेलाडीहरुमात्रै लगानी गर्दैनन् । गल्ली गल्लीमा पुगेर खोजेको प्रतिभालाई पनि स्थान दिन्छन् । सिनियर स्तरको खेल वा घरेलु क्रिकेट नै नखेलेका किन नहोस्, विश्वकै चर्चित र लोकप्रिय क्रिकेट लिग आइपिएलमा अनुभव भन्दापनि प्रतिभालाई प्राथमिकता दिइन्छ । यसले फ्रेन्चाइज टोलीको अक्सनमा मूल्य बचाउन ठूलो भूमिका खेल्दा क्षमता भएका प्रतिभाले पनि अवसर पाउने गर्दछन् ।

फ्रेन्चाइज टोलीहरुले स्काउटिङ गर्दौ प्रतिभा खोजेर एकेडेमीमा ल्याउँदै तयार पारेपछि अक्सनबाट भित्र्याउने गर्दछन् ।

भारतीय क्रिकेटका सुपरस्टार हार्दिक पान्ड्या र जस्प्रित बुमराह मुम्बई इन्डियन्सको स्काउटिङ टिमले खोजेको उदाहरणीय क्रिकेटर हुन् । मुम्बईको प्रतिभा खोजीको लिष्टमा २४ वर्षीय विग्नेश पुथुर पनि समावेश भएका छन् ।

१० महिना अघि मात्रै मुम्बईको स्काउटिङ टिमले केरलाबाट ल्याएको पुथुरले भारतको कुनैपनि किसिमको सिनियर प्रतियोगिता खेलेका छैनन् । तर आइतवार राती चेन्नई सुपर किंग्सविरुद्ध ३ विकेट लिँदै ड्रिम डेब्यू गरे ।

टस हारेर पहिला ब्याटिङ गरेको मुम्बईले २० ओभरमा ९ विकेट गुमाउँदै १ सय ५५ रन बनाएको थियो । त्यसपछि पूर्व कप्तान रोहित शर्माको स्थानमा इम्प्याक्ट प्लेयरको रुपमा चेन्नईको घरेलु मैदान चेपकमा छिरेका थिए ।

ठूलो प्रतियोगता नखेलेका, पहिलो खेलको दबाब र आईपीएल जस्तो विग स्टेजमा उनले पहिलो खेलमै आफ्नो प्रभाव छाड्न सफल भए । कार्यवहाक कप्तान सूर्यकुमार यादवले आठौं ओभरमा उनलाई पहिलो बल दिएका थिए । उनले चेन्नईका कप्तान ऋतुराज गायकवाडलाई एक सिंगल दिँदै सुरुवात गरे ।

पाँचौं बलमा ठूलो सट खेलेका ऋतुराज गायकवाड विल जायक्सबाट क्याच आउट भए । २६ बलमा ६ चौका र ३ छक्काका साथ ५३ रन प्रहार गरेका ऋतुराजलाई आउट गर्दै मुम्बईलाई जितको झिनो आशा देखाएका थिए ।

त्यसपछि दशौं ओभरको चौथो बलमा खेलेका शिवम दुवे लङअनमा ९ रनमा क्याच आउट भए । १२ औं ओभरको पहिलो बलमा रचिन रविन्द्रले केहि अघि बढेर उनलाई छक्का हानेका थिए । तर चौथो बलमा दीपक हुडालाई ३ रनमा क्याच गराए ।

त्यसपछि १८ औं ओभरमा आएका उनलाई रचिन रविन्द्रले तेस्रो र अन्तिम बलमा छक्का प्रहार गरेका थिए । मुम्बईले खेल चार विकेटले हारेपनि समग्रमा पुथुरले ४ ओभरमा ३२ रन खर्चेर ३ विकेट लिए ।

बायाँ हाते भएपनि नाडीको बलले बल घुमाउने क्षमता निकै कम खेलाडीमा हुन्छ । पिचको अवस्था बुझ्दै बलको गति लगातार परिवर्तन गर्नु, लेगस्पिन र गुगली दुवै बल फाल्ने खुबी उनले खेलमा देखाएका थिए ।

को हुन् पुथुर ?

पुथुरको जन्म सन् २००१ मार्च २ मा केरलाको मलापुरममा भएका हो । उनका बुबा सुनिल कुमार एक अटोरिक्सा चालक हुन् । आमा केपी विन्दु घरमै काम गर्छिन् । कमजोर आर्थिक अवस्था भएपनि परिवारले उनको क्रिकेट यात्रामा साथ दिँदै आएको छ । क्रिकेट यात्रालाई अघि बढाउन उनी मलापुरमबाट त्रिशुर गएका थिए ।

बाल्यकालमा मध्यगतिका बलरको रुपमा करिअर अघि बढाएका उनले स्थानीय क्रिकेटर मोहम्मद शरिफको सुझावमा स्पिन थालेका थिए । केरला कलेज प्रिमियर लिग थोमस कलेजबाट प्रतिनिधित्व गरेका थिए ।

त्रिशुरको सेन्ट थोमस कलेजबाट उनले साहित्य कलामा स्नातकोत्तर गरेका छन् । उनले केरलाबाट यू१४, यू१९ र यू२३ किकेट प्रतिनिधित्व गरेका छन् ।

गत सेप्टेम्बरमा केरला प्रिमियर लिगमा उनले एलेप्पी रिपल्सबाट खेल्दै ३ खेलमा दुई विकेट लिएका थिए । मुम्बईको स्काउटिङ टिमले उनलाई आफ्नो एकेडेमीमा ल्याएर समेत प्रशिक्षण गराएको थियो । गत नोभेम्बर अन्तिम साता भएको अक्सनमा न्यूनतम मूल्य ३० लाखमा अनुबन्ध गरेको थियो ।

गत जनवरी फेब्रुअरीमा सम्पन्न एसएटी२० लिगमा नेट बलरको रुपमा दक्षिण अफ्रिका पठाउँदै उनको प्रतिभामा थप निखारपन ल्याउन प्रयास गरेको थियो । जहाँ एमआई केप टाउनका कप्तान तथा वर्तमान समयका उत्कृष्ट स्पिनर राशिद खानसँग थप सिक्न पाए ।

खेल सम्पन्न पछि पेभेलिएन फर्किनेक्रममा चेन्नईका महेन्द्रसिंह धोनीले पनि उनको प्रदर्शनको तारिफ गर्दै बधाई दिएका थिए ।

‘मुम्बई युवा खेलाडीलाई अवसर दिन परिचित छ । मुम्बई स्काउटको १० महिनामै विग्नेशले यो किसिमको प्रदर्शन गर्न सफल भएका छन् । यदि खेल अन्तिमसम्म जान्छ कि भनेर मैले एक ओभर उनको बचाएर राखेको थिए’, खेलपछि सुर्यकुमार यादवले भने ।

-एजेन्सीको सहयोगमा भूपेन्द्र जिसीको प्रस्तुती