काठमाडौं (हाम्रो खेलकुद)- प्रधानमन्त्री कप पुरूष एक दिवसीय राष्ट्रिय क्रिकेट प्रतियोगितामा एपिएफले गण्डकी प्रदेशलाई ३१ रनले हराएको छ।

एपिएफको यो जितसँगै अब पिएम कप फाइनलको होडमा ३ विभागीय टोली मात्र रहेका छन्। बाँकी ७ प्रदेश टोलीको फाइनलमा पुग्ने संभावना समाप्त भएको छ।

एक्सट्रा टेक ओभल मैदानमा जितको लागि २ सय ५९ रनको लक्ष्य पछाएको गण्डकी प्रदेश ५० ओभरमा ८ विकेट गुमाउँदै २ सय २७ रनमा समेटियो। गण्डकीका खेलाडीहरूले धेरै बल डटमा खर्चिए।

जुन हारको कारण बन्यो। उसको लागि अर्जुन कुमालले सर्वाधिक ३९ रन जोडे। उनले ८२ रन खर्चेर ३ चौका प्रहार गरे।

दिनेश बुढामगरले ४५ बल खेलेर ३४ रन बनाए। मुस्कान थापा र अमृत गुरुङले समान २३ रन जोडे। मुस्कानले ६१ बल खेले ।

सुदिप अर्याल अविजित २५ रनमा रहे। एपिएफले ३५ रन एक्स्ट्रा दिएको थियो। बलिङमा अभिषेक गौतमले ३ र अमर राउटेलाले २ विकेट लिए।

त्यसअघि पहिले ब्याटिङ गरेको एपिएफले ४९.२ ओभरमा सबै विकेट गुमाएर २ सय ५८ रनको योगफल खडा गर्यो। एपिएफले सानदार सुरुवात गर्यो।

ओपनर लोकेश बम र आशिफ शेखले पहिलो विकेटको लागि १ सय २५ रनको साझेदारी गरे। लोकेश अर्धशतकबाट ४ रनले चुके। उनी सन्दीप पराजुलीको बलमा आउट भए। आशिफले भने ८० रनको पारी खेले। ७४ बल खेल्दै उनले १० चौका र १ छक्का प्रहार गरे।

यसैगरी सुमित मगर्जनले ३१ रन, कमल ऐरीले २५ रन र अमर राउटेलाले २४ रन बनाएका थिए। बलिङमा सुदीप अर्याल र सन्दीप पराजुलीले समान ३ विकेट लिए। कमल परियारले २ विकेट आफ्नो नाममा लेखाए।

यो जितमा एपिएफले ७ खेलबाट १० अंक बनाएको छ। गण्डकीको आठौं खेलमा यो सातौं हार हो।