काठमाडौं(हाम्रो खेलकुद) – कर्णाली प्रदेशले प्रधानमन्त्री (पिएम) कप एकदिवसीय राष्ट्रिय प्रतियोगितामा मधेशविरुद्ध ऐतिहासिक योगफल तयार गरेको छ ।

जारी खेलमा कर्णालीले मधेशविरुद्ध रनको ऐतिहासिक योगफल तयार गर्ने क्रममा एक्स्ट्रा टेक ओभलमा टस जितेर ब्याटिङ गर्दै ४९.१ ओभरमा २ सय २० रनको बनाएको छ ।

कर्णालीले यसअघि कोशीविरुद्ध यसै संस्करणमा २ सय १८ रनको योगफल तयार गरेको थियो ।

कर्णालीका लागि निरन्तर दोस्रो खेलमा अर्धशतक बनाएका दीपेन्द्र रावतले सर्वाधिक ६१ रन जोडे । उनले ९२ बलमा ६ चौका प्रहार गरे ।

पाँचौं विकेटका लागि दीपेन्द्रले अर्जुन घर्तीसँग ३६ रनको साझेदारी गरे । अर्जुन २० बलमा २ चौका र १ छक्काको सहयोगमा २६ रनमा आउट भए ।

सातौं विकेटका लागि दिनेश अधिकारीसँग दीपेन्द्रले ६० रनको साझेदारी गरे । दिनेशले ४४ बलमा १ चौका र २ छक्काको साथमा २४ रन जोडे ।

प्रकाश जैशी ३७ बलमा २०, रविन्द्र जंग शाही १४ बलमा १३ रन जोड्दै आउट हुँदा कप्तान दिवान पुन २० बलमा १८ रनमा नट आउट रहे ।

मधेशका लागि रुपेश सिंह, रञ्जित कुमार, कप्तान अनिल साह, कमल गुप्ता र हरिशंकर साहले समान २ विकेट लिए ।

कर्णाली ६ खेलमा ६ अंकका साथ पाँचौ स्थानमा छ । मधेश ५ खेलमा ४ अंकका साथ छैठौं स्थानमा छ ।