काठमाडौं (हाम्रो खेलकुद)- नेपाल पुलिस क्लबका स्पिनर ललित नारायण राजवंशी लुम्बिनी प्रदेशमा जारी प्रधानमन्त्री कप पुरुष एकदिवसीय राष्ट्रिय क्रिकेट प्रतियोगितामा प्रदर्शन अब्बल रहँदै आएको छ।

पुलिसले अहिले सम्म खेलेका सबै ६ खेलमा जित निकाल्न सफल रहँदा ललितको प्रदर्शन प्रमुख बनेको छ। उनको बलिङको जादु चलिरहेको छ। क्रिकेटमा ५ विकेट हलको महत्त्व विशेष मानिन्छ।

लेफ्ट आर्म स्पीनर ललितले एक खेलमा मात्र होइन ।‌ लगातार ४ खेलमा ५ विकेट हलको सफलता प्राप्त गरेका छन्। यस‌ किसिमको बेजोड बलिङ क्रिकेटमा विरलै देख्न पाइन्छ। जुन ललितले देखाइरहेका छन्।

राष्ट्रिय क्रिकेट टोलीका सदस्य समेत रहेका ललितले लुम्बिनी र कोशी प्रदेश विरुद्ध समान २ विकेट लिएका थिए। यसपछि एपिएफ विरुद्धको खेलमा ६ विकेट लिए। उनले त्यसमा ७.४ ओभरमा ३ मेडन सहित मात्र १८ रन दिएर ६ विकेट लिए।

उनको यो सानदार प्रदर्शन मधेश प्रदेश विरुद्धको खेलमा पनि दोहरियो। त्यो खेलमा ९.१‌ओभरमा १ मेडन सहित २८ रन खर्चेर ५ विकेट लिए।

उनको यो प्रदर्शन सुदूरपश्चिम प्रदेश विरुद्धको खेलमा पनि जारी रहयो। अझ भनौं उनको प्रदर्शन झन प्रभावशाली बन्यो। ७ ओभर बलिङ गर्दै मात्र १५ रन दिएर ६ विकेटको सफलता प्राप्त गर्यो। लगातर ३ खेलमा उनले ५ विकेट हल पूरा गरे।

५ विकेट हलमा ह्याट्रिक गरेका ललितको यो प्रदर्शन रोकिएन। उनले आज गण्डकी प्रदेश विरयद्ध पनि ५ विकेट झारे। ५ .२ ओभर बलिङ गरेका उनले २ मेडन सहित मात्र ७ रन दिएर ५ विकेट लिए। उनको आजको बलिङ फिगर क्रिकेटमा कमै देख्न पाइन्छ।

यसरी ललितको उच्च फर्म र उत्कृष्ट प्रदर्शन जारी छ। उनले ६ खेलबाट २६ विकेट लिइसकेका छन्। उनले २ खेलमा ६ विकेट, २ खेलामा ५ विकेट तथा २ खेलमा २ विकेट लिएका छन्।

यसरी जारी प्रतियोगितामा ब्याटरलाई ललितले निकै दबाब दिएका छन्। यो लोभ लाग्दो प्रदर्शनमा उनको टोलीलाई निकै फाइदा पुगेको छ। घरेलु क्रिकेटमा ललितको यो करियरकै उत्कृष्ट प्रदर्शन पनि हो।