काठमाडौं(हाम्रो खेलकुद) – कर्णाली प्रदेशले प्रधानमन्त्री(पिएम) कपमा पुरुष एकदिवसीय राष्ट्रिय क्रिकेट प्रतियोगितामा कोशीविरुद्ध जित हात पारेको छ ।

मंगलवार भएको खेलमा कर्णालीले कोशीमाथि १ सय २७ रनको फराकिलो जित हासिल गरेको हो । कर्णालीले दिएको २ सय १९ रनको मध्यम लक्ष्य पछ्याएको कोशी ३५ ओभरमा ९१ रनमा समेटिएको थियो ।

कोशीका लागि ओपनर चिराग साहले सर्वाधिक २५ रन जोडे । उनले ५२ बलको सामना गर्दै ४ चौका प्रहार गरेका थिए । सकिब हक १३ र कप्तान अंकित सुवेदी १० रनमा आउट भए । कोशीका अन्य ब्याटरले दोहोरो अंकमा रन जोड्न सकेनन् ।

कर्णालीका लागि सुनिल धमला र दीपेन्द्र रावतले समान ३, कप्तान दिवान पुनले २ तथा अनुज चुनाराले १ विकेट लिए ।

त्यसअघि एक्स्ट्रा टेक ओभलमा टस जितेर ब्याटिङ गरेको कर्णालीले निर्धारित ५० ओभरमा ९ विकेट गुमाएर २ सय १८ रनको योगफल तयार गरेको थियो ।

कर्णालीका लागि अर्जुन घर्तीले नट आउट रहँदै सर्वाधिक ८८ रन जोडेका थिए । उनले ९५ बलको सामना गर्दै ११ चौका र २ छक्का प्रहार गरेका थिए । हिमाशुं शाहीले ७३ बलमा ४ चौका र २ छक्काको सहयोगमा ४६ रन जोडेका थिए । निश्चल रावल १२, प्रकास जैसी १८ तथा सुनिल धमला १३ रनमा आउट भएका थिए ।

कोशीका लागि विपिन महतोले ३, दिपेश कंडेल र प्रकाश कार्कीले समान २ तथा सुजन थपलिया र श्रवण किस्कुले समान १ विकेट लिए ।

जितसँगै कर्णाली ५ खेलमा दोस्रो जितका साथ अंक तालिकाको पाँचौं स्थानमा उक्लिएको छ । पराजित कोशी छैठौं खेलमा २ अंकका साथ तालिकाको पुछारमा छ ।