काठमाडौं(हाम्रो खेलकुद) – बागमती प्रदेशले प्रधानमन्त्री(पिएम) कपमा पुरुष एकदिवसीय राष्ट्रिय क्रिकेट प्रतियोगितामा गण्डकीविरुद्ध वलियो योगफल तयार गरेको छ ।

बागमतीले गण्डकी प्रदेशविरुद्ध २ सय ८८ रनको बलियो योगफल तयार गरेको हो । सिद्धार्थ क्रिकेट मैदानमा टस हारेर ब्याटिङको निम्तो पाएको बागमतीले निर्धारित ५० ओभरमा ८ विकेट गुमाएर २ सय ८८ रनको योगफल तयार गर्यो ।

बागमतीका लागि ओपनर इशान पाण्डेले सर्वाधिक ६९ रन बनाए । उनले ८२ बलमा ६ चौका प्रहार गरे । दोस्रो विकेटका लागि शुभ कंसाकारसँग इशानले ९० रनको महत्वपुर्ण साझेदारी गरेका थिए । शुभ ५१ बलमा ९ चौकाको सहयोगमा ५२ रनमा आउट भए ।

विपिन आचार्य ४२ बलमा ७ चौका र २ छक्काको सहयोगमा ६३ रन जोड्दै नट आउट रहे । नवौं विकेटका लागि विपिनले रिजन ढकालसँग मिलेर नट आउट ७६ रनको महत्वपुर्ण साझेदारी गरे । रिजन २४ बलमा ३ चौकाको सहयोगमा २३ रनमा नट आउट रहे ।

विवेक राना मगर ३७ बलमा ४ चौका र २ छक्काको सहयोगमा ३४ रन बनाउँदै आउट भए । कप्तान पृथु बास्कोटा १६ तथा ओपनर आशुतोष घिरैया १४ रनमा आउट भए ।

गण्डकीका लागि अर्जुन कुमालले ४ तथा विपिन खत्री र सुवास भण्डारीले समान २ विकेट लिए । गण्डकी र बागमती समान ४ खेलमा १ जित र ३ हारमा रहेको छ । दुवै टोली यस खेलमा दोस्रो जितको खोजीमा रहेका छन् ।