काठमाडौं(हाम्रो खेलकुद) – त्रिभुवन आर्मी क्लबले प्रधानमन्त्री (पिएम) कप पुरुष एकदिवसीय राष्ट्रिय प्रतियोगितामा एपिएफ क्लबलाई हराउँदै लगातार पाँचौ जित निकालेको छ ।

विभागीय डर्बीमा सोमवार आर्मीले एपिएफलाई ३ विकेटले पराजित गर्यो । १ सय ४२ रनको लक्ष्य आर्मीले ४२.५ ओभरमा ७ विकेट गुमाएर पूरा गर्यो ।

आर्मीको जितमा कुशल मल्लले नट आउट रहँदै सर्वाधिक ३१ रन बनाए । उनले ५९ बलको सामना गर्दै ४ चौका र १ छक्का प्रहार गरे ।

आर्मी एक समय ८७ रनमा सातौं विकेट गुमाएर समस्यामा आएको थियो । तर, आठौं विकेटका लागि कुशलले सोमपाल कामीसँग मिलेर नट आउट ५८ रनको विजयी साझेदारी गरे ।

सोमपालले ५१ बलमा १ चौकाको सहयोगमा नट आउट २२ रन जोडे । विवेक यादवले २९ बलमा ४ चौकाको सहयोगमा २६ रन बनाए । बसिर अहमद ४२ बलमा १३ तथा इम्रान शेख ३१ बलमा ११ रन बनाउँदै आउट भए ।

एपिएफका लागि कप्तान रोहित पौडेल, कमलसिंह ऐरी र अमरसिंह राउटेलाले समान २ तथा किशोर महतोले १ विकेट लिए ।

त्यसअघि एक्स्ट्रा टेक ओभलमा टस हारेर ब्याटिङको निम्तो पाएको एपिएफ ४२.३ ओभरमा १ सय ४१ रनमा अल आउट भयो ।

एपिएफका लागि सन्दीप जोराले ९१ बलमा ९ चौकासहित सर्वाधिक ६५ रन जोडे । किशोर महतो, अमरसिंह राउटेला र भुवन कार्की समान ११ रनमा आउट हुँदा अन्य ब्याटरले दोहोरो अंकमा रन जोड्न सकेनन् ।

ओपर आसिफ शेख ६, अर्का ओपनर लोकेश बम र कप्तान रोहित समान ४ तथा कमलसिंह ऐरी ३ रनमा आउट भए ।

आर्मीका लागि आकाश चन्दले ४, सोमपाल कामीले ३, शाहब आलमले २ र बसिर अहमदले १ विकेट लिए ।

जितसँगै आर्मी ५ खेलमा अपराजित रहँदै अंक तालिकाको दोस्रो स्थानमा यथावत छ । ५ खेलमा ३ जितका साथ अंक तालिकाको चौथो स्थानमा झरेको छ ।