काठमाडौं(हाम्रो खेलकुद) – लुम्बिनी प्रदेशले प्रधानमन्त्री(पिएम) कप पुरुष एकदिवसीय राष्ट्रिय प्रतियोगितामा मधेश प्रदेशविरुद्ध जित निकालेको छ ।

सोमवार दाङमा भएको खेलमा लुम्बिनीले मधेशमाथि ८३ रनको जित हात पारेको हो । लुम्बिनीले दिएको १ सय ५९ रनको मध्यम लक्ष्य पछ्याएको मधेश २६.५ ओभरमा ७५ रनमा समेटियो ।

मधेशका लागि दीपेश दासले सर्वाधिक २३ रन जोडे । उनले ५९ बलको सामनामा १ चौका प्रहार गरे । हरिशंकर साह ३३ बलमा १४ रनमा आउट भए । मधेशका अन्य ब्याटरले दोहोरो अंकमा रन जोड्न सकेनन् ।

लुम्बिनीका लागि रमेश कुर्मीले ४, विप्रेशन केसीले ३ तथा देव खनाल र अजय चौहानले समान १ विकेट लिए ।

त्यसअघि लमहीस्थित देउखुरी क्रिकेट मैदानमा टस हारेर ब्याटिङको निम्तो पाएको लुम्बिनी प्रदेश ४६ ओभरमा १ सय ५८ रनको मध्यम योगफलमा समेटिएको थियो ।

लुम्बिनीका लागि आकाश त्रिपाटीले सर्वाधिक ७३ रन जोडेका थिए । उनले १ सय २३ बलको सामना गर्दै ६ चौका र १ छक्का प्रहार गरेका थिए । कृष्ण कार्कीले ५३ बलमा १ चौका र ३ छक्काको सहयोगमा ३३ रन जोडेका थिए ।

कप्तान देव खनाल १६ रनमा आउट हुँदा अन्य ब्याटरले दोहोरो अंकमा रन बनाउँन सकेनन् ।

मधेशका लागि कमल गुप्ता र विशाल पटेलले समान ३ तथा हरिशंकर साह, प्रदिप पासवान र रञ्जित कुमारले समान १ विकेट लिए ।

यो जितसँगै लुम्बिनीले ५ मध्ये ४ खेल जितेर ८ अंक जोडेको छ । पराजित मधेश को ४ मध्ये ३ खेल हारेर २ अंक रहेको छ ।