काठमाडौं(हाम्रो खेलकुद) – नेपाल एपिएफ क्लबले प्रधानमन्त्री (पिएम) एकदिवसीय राष्ट्रिय क्रिकेट प्रतियोगिता २०२५ मा आज कर्णाली प्रदेशलाई हराएको छ ।

एपिएफले कर्णालीलाई ५ विकेटले पराजित गर्यो । १ सय ९० रनको लक्ष्य एपिएफले ३९.२ ओभरमा ५ विकेट गुमाएर पूरा गर्यो ।

एपिएफको जितमा दिपक बोहोराले नट आउट रहँदै ६७ बलमा ८ चौका र ४ छक्कासहित सर्वाधिक ७० रन जोडे । एपिएफ ८६ रनमा ५ विकेट गुमाएर कठिन अवस्थामा पुगेको थियो ।

छैठौं विकेटका लागि दिपक र सुमित महर्जनले नट आउट १ सय ७ रनको शतकीय साझेदारी गरे । सुमितले ५३ बलमा ४ चौका र १ छक्काको सहयोगमा नट आउट ३४ रन बनाए ।

ओपनर आसिफ शेख १७ बलमा ३ चौका र १ छक्काको सहयोगमा २५ रन बनाए । अर्का ओपनर लोकेश बम ३२ बलमा २२ तथा कप्तान रोहित पौडेल ३४ बलमा २२ रन जोड्दै आउट भए ।

कर्णालीका लागि कप्तान दिवान पुन र दिपेन्द्र रावतले समान २ तथा प्रकाश जैसीले १ विकेट लिए ।

त्यसअघि सिद्धार्थ क्रिकेट मैदानमा टस जितेर ब्याटिङ गरेको कर्णाली ४७ ओभरमा १ सय ८९ रनमा समेटिएको थियो ।

कर्णालीका लागि ओपनर सुनिल धमलाले ७५ बलमा ४ चौका र ६ छक्का साथ सर्वाधिक ४७ रन जोडे ।

दिनेश अधिकारी २६ बलमा २ चौका र ३ छक्काको सहयोगमा ३३ रन बनाए । प्रकाश जैशी २० रनमा आउट हुँदा दिपेन्द्र रावत ३४ बलमा ३ चौकाको सहयोगमा ३० रनमा नट आउट रहे ।

एपिएफका लागि अभिषेक गौतमले ४, कमलसिंह ऐरीले २ तथा किशोर महतो, दिपक बोहोरा, कप्तान रोहित र भुवन कार्कीले समान १ विकेट लिए ।

एपिएफ चौथो खेलमा ३ जितका साथ तेस्रो स्थानमा उक्लिएको छ । कर्णाली ५ खेलमा चौथो हारका साथ २ अंकमा रहेको छ ।