हिमाल खरेल,मेचीनगर

थन्डर–११ झापाको मेचीनगर–४ बाहुनडाँगीमा जारी इन्डो–नेपाल टि–ट्वान्टी क्रिकेट प्रतियोगिताको फाइनल प्रवेश गरेको छ ।

आयोजक बाहुनडाँगी क्रिकेट क्लबलाई शनिवार ७६ रनले पराजित गर्दै थन्डर उपाधि नजिक पुगेको हो।सरस्वती माविको खेल मैदानमा टस हारेर पहिलो ब्याटिङ गरेको थन्डरले १९.५ ओभरमा सबै विकेट गुमाउँदै २‌ सय ५ रन बनाएको थियोे ।

थन्डरका लागि रोहित राजवंशीले सर्वाधिक ७३ रन बनाए । त्यस्तै, विशेष बुढाथोकीले २८ रन, चन्द्र भट्टराईले २४ तथा विराट डाँगीले २० रन जोडे ।

बाहुनडाँगीका लागि आयुष दाहाल र सन्तोष प्रधानले समान ३ , नाजिर हुसेनले २ तथा रमन कार्की र निरोथ रोयले समान १ विकेट लिए ।

२ सय ६ रनको विशाल विजयी लक्ष्य पछ्याउने क्रममा बाहुनडाँगीले निर्धारित २० ओभरमा सबै विकेट गुमाउँदै १ सय २९ रन बनाउन सक्यो ।

बाहुनडाँगीका लागि राजेश थापाले सर्वाधिक ४६ रन बनाए । गणेश पौडेलले १७ रन तथा आयुष दाहालले १४ रन जोडे ।

अन्य ब्याट्सम्यानले राम्रो प्रदर्शन गर्न नसक्दा आयोजक बाहुनडाँगी सेमिफाइनलबाटै बाहिरिएको हो । थन्डरका लागि विराट डाँगी, शिव राजवंशी र एलिट राईले समान २/२ विकेट हात पारे ।

थन्डरका रोहित राजवंशी प्लेयर अफ दि म्याच घोषित भए । उनले १ हजार रुपैयाँ र मायाको चिनो प्राप्त गरे ।

चैत ४ गते हुने फाइनलमा उपाधिका लागि थन्डर ११ ले पेनोरिस ११ को सामना गर्नेछ ।