काठमाडौं(हाम्रो खेलकुद) – कमलसिंह ऐरीको अलराउण्ड प्रदर्शनको सहयोगमा एपिएफ क्लबले प्रधानमन्त्री (पिएम) कप पुरुष एकदिवसिय राष्ट्रिय क्रिकेट प्रतियोगितामा लगातार दोस्रो जित निकालेको छ।

लगातार दोस्रो जित हात पार्ने क्रममा बिहीवार भएको खेलमा एपिएफले मधेश प्रदेशलाई २ विकेटले हरायो । १ सय ६९ रनको सामान्य लक्ष्य एपिएफले ३६.१ ओभरमा ८ विकेट गुमाएर पूरा गर्यो ।

एपिएफको जितमा सुमित महर्जनले ४५ बलमा ५ चौकासहित सर्वाधिक ३५ रन जोडे । ओपनर आसिफ शेखले ३४ बलमा ३ चौका र १ छक्काको सहयोगमा ३४ रन जोडे ।

अर्का ओपनर लोकेश बमले ११ बलमा १८ रन बनाए । प्लेयर अफ द म्याच भएका कमलले ३१ बलमा ३ छक्काको सहयोगमा नट आउट २८ रन जोडे । अमरसिंह राउटेला १६ तथा कप्तान रोहित कुमार पौडेल ११ रनमा आउट भए ।

मधेशका कमल गुप्ताले ४, प्रदिप पासवानले २ तथा हरिशंकर शाह र रुपेश सिंहले समान १ विकेट लिए ।

त्यसअघि दाङको लमही क्रिकेट मैदानमा टस जितेर पहिले ब्याटिङ रोजेको मधेश ४०.४ ओभरमा १ सय ६८ रनको सामान्य योगफलमा समेटिएको थियो ।

मधेशका लागि अघिल्लो खेलमा शतकबाट चुकेका पवन सरार्फले सर्वाधिक ७७ रन जोडे । पवनले ७७ बलको सामना गर्दै ८ चौका र ५ छक्का प्रहार गरेका थिए ।

कप्तान अनिल शाह १८ बलमा १७, मयन यादव ११ र रुपेश सिंह र प्रदिप पासवान समान १० रनमा आउट भए ।

एपिएफका लागि कमलले ४, कप्तान रोहित र भुवन कार्कीले समान २ तथा अभिषेक गौतमले १ विकेट लिए ।

लगातार दोस्रो जित निकालेको एपिएफ ४ अंकका साथ दोस्रो स्थानमा छ । एपिएफले पहिलो खेलमा बागमतीलाई पराजित गरेको थियो ।

पराजित मधेशको २ खेलबाट २ अंक भएको छ । पहिलो खेलमा मधेशले कोशी प्रदेशलाई पराजित गरेको थियो ।