काठमाडौं(हाम्रो खेलकुद) – विभागीय टोली नेपाल पुलिस क्लबले प्रधानमन्त्री कप (पिएम) राष्ट्रिय पुरुष एकदिवसीय क्रिकेट प्रतियोगितामा लगातार दोस्रो जित हासिल गरेको छ ।

पुलिसले बुधवार कोशी प्रदेशलाई १ सय ५४ रनको फराकिलो अन्तरले पराजित गरेको छ । २ सय ८९ रनको लक्ष्य पछ्याएको कोशी ३६.२ ओभरमा १ सय ३४ रनमा अल आउट भयो ।

कोशीका लागि सुजन थपलियाले ५२ बलमा २ चौका र २ छक्काको सहयोगमा नट आउट रहँदै सर्वाधिक ३३ रन जोडे ।

कप्तान अंकित सुवेदीले ३९ बलमा २१ रन बनाए । शकिब हकले ३६बलमा १७ तथा फिर्दोस अन्सारी १२ बलमा १० जोड्दै आउट भए ।

पुलिसका लागि करण केसीले ३, कुशल भुर्तेल र लतित नारायण राजवंशीले समान २ तथा सागर ढकाल, गुल्शन झा र दिपेन्द्रसिंह ऐरीले समान १ विकेट लिए ।

त्यसअघि भैरहवामा रहेको एक्स्ट्रा टेक ओभलमा टस जितेर पहिले ब्याटिङ रोजेको पुलिसले निर्धारित ५० ओभरमा ८ विकेट गुमाएर २ सय ८८ रन जोड्यो ।

पुलिसका लागि लगातार दोस्रो खेलमा पनि अर्धशतक बनाएका कुशल भुर्तेलले सर्वाधिक ६५ रन जोडे । उनले ७८ बलमा २ चौका र २ छक्का प्रहार गरे । दीलिप नाथले ६४ बलमा ४ चौका र १ छक्काको सहयोगमा ६१ रन बनाए ।

ओपनर अर्जुन साउद र रशिद खान समान ३८, कप्तान दीपेन्द्र ३२ तथा गुल्शन झा २१ रनमा आउट भए । कोशीका लागि भुपाल लुईंटेलले ३, प्रकाश कार्कीले २ तथा श्रवण किस्कु, दीपेश कंडेल र फिर्दोश अन्सारीले समान २ विकेट लिए ।

लगातार दोस्रो जित हासिल गरेको पुलिसले ४ अंक बनाएको छ । पहिलो खेलमा पुलिसले लुम्बिनी प्रदेशलाई ८७ रनले पराजित गरेको थियो ।

लगातार तेस्रो हार बेहोरेको कोशी अंक बिहिन छ । कोशी यसअघि मधेश र लुम्बिनीसँग पराजित भएको थियो ।