काठमाडौं (हाम्रो खेलकुद)- प्रधानमन्त्री कप (पिएम) राष्ट्रिय क्रिकेट प्रतियोगितामा गण्डकी प्रदेश पहिलो जित दर्ज गर्न सफल भएको छ। आज गण्डकीले कर्णाली प्रदेशलाई ४ विकेटले पराजित गर्यो।

कम योगफलको प्रतिस्पर्धामा गण्डकीले जितको लागि मात्र ९२ रनको सहज लक्ष्य पायो। जहाँ उसले २९.१ ओभरमा ६ विकेट गुमाउँदै जित निकाल्यो।

सहज लक्ष्य पाएपनि गण्डकीले सुरुवात कमजोर गर्यो। २१ रन जोड्दा ४ विकेट गुमायो। पहिलो कर्मका ३ खेलाडी समिर कँडेल बिना कुनै रन आउट भए। अर्जुन कुमाल र वंश क्षेत्री पनि समान ६ रन जोडेर पबिलियन फर्के। लगतै सुबाश भण्डारी पनि ४ रनमा आउट भए।

यसपछि दीपक डुम्रेले सम्हालिदै अविजित अर्धशतक प्रहार गर्दै टिमलाई जित दिलाए। उनले ७८ बल खेल्दै ७ चौका सहित अविजित ५० रन बनाए। सुजन गौतम अविजित २२ रनमा रहे। बलिङमा दीवान पुनले ३ र दीपेन्द्र रावतले २ विकेट लिए।

दाङको देउखुरी अन्तराष्ट्रिय क्रिकेट स्टेडियममा यसअघि पहिले ब्याटिङ गरेको कर्णालीले २७.२ ओभरमा सम्पूर्ण विकेट गुमाउँदै मात्र ९१ रन बनायो।

विपिन शाहीले सर्वाधिक २० रन बनाए। अर्जुन घर्तीले १७, विपिन रावतले १५ र हिमांशु शाहीले १२ रन बनाए। यसबाहेक अन्यले दोहोरो रन छुन सकेनन्। बलिङमा चन्द्र पौडेल, सुबाश भण्डारी र विपिन खत्रीले समान २ विकेट लिए।

दुई खेल खेलेको गण्डकीको यो पहिलो जित हो। उसले २ अंक बनाएको छ। पहिलो खेल जित्दै विजयी सुरुवात गरेको कर्णालीको यो पहिलो हार हो। उसको पनि २ अंक छ।