चितवन (हाम्रो खेलकुद)- अर्किड इङ्लिस स्कुलले भरतपुर मेयर्स कप इन्टर स्कुल लिग क्रिकेटको उपाधि जितेको छ ।

गौतमबुद्ध अन्तर्राष्ट्रिय क्रिकेट रंगशालाको नमुना मैदानमा आज भएको फाइनल खेलमा अर्किडले नारायणी नमुना माविलाई ४ विकेटले पराजित गर्दै लगातार दोस्रोपटक उपाधि उचालेको हो ।

७७ रनको झिनो लक्ष्य अर्किडले २५.३ ओभरमा ६ विकेट गुमाउँदै पूरा गर्‍यो । अर्किडको जितमा सलमान अन्सारीले अविजित २३ र मन्दिप बरालले १८ रनको बनाए । नारायणीका उमेश महतोले २ र राहुल कुशवाहाले १ विकेट लिए ।

त्यसअघि टस जितेर पहिले ब्याटिङ गरेको नारायणीले २३.३ ओभरमा ७६ रनमै अलआउट भयो । उसका लागि आयुस गिरीले २५ र समीर पौडेलले १४ रन बनाए ।

नारायणीलाई सस्तैमा समेट्न अर्किडका प्रसिद्ध अर्यालले ६ ओभरमा मात्र ७ रन खर्चिदै ४ विकेट लिए । कप्तान मन्दिप बरालले ६ ओभरमा २२ रन खर्चिदै ४ विकेट लिए ।

अर्किडका कप्तान मन्दिप बराल फाइनलको प्लेयर अफ दि म्याच भए । ६ खेलमा २३ विकेट लिएका मन्दिप प्रतियोगिताकै सर्वाधिक विकेट लिने खेलाडी बने ।

यस्तै ७ खेलमा २ सय ३४ रन बनाएका नारायणी इङ्लिस पब्लिक स्कुलका कृष्ण मगर प्रतियोगितामा सर्वाधिक रन बनाउने खेलाडी घोषित भए ।

विजेता र उपविजेता टोलीलाई भरतपुर महानगरपालिका प्रमुख रेनु दाहाल, उपप्रमुख चित्रसेन अधिकारी, चितवन जिल्ला क्रिकेट संघका अध्यक्ष सुदिप पिया, चितवन राइनोजका सिइओ प्रताप देवकोटाले पुरस्कार वितरण गरे ।

भरतपुर महानगरपालिकाको आयोजना करिब ३ महिना चलेको प्रतियोगितामा ४७ विधालय सहभागी थिए । ६ वटा विधालय छनोट चरण पार गर्दै लिग चरण प्रवेश गरेका थिए ।

पहिलो संस्करणका सेमिफानालिस्ट सिधै लिग चरणमा स्थान बनाएका थिए । कुल १० टोलीले लिग चरण सेतो जर्सी र रातो बलमा ३० ओभरको खेल खेलेका थिए ।