हिमाल खरेल, मेचीनगर

झापाको मेचीनगर–४ बाहुनडाँगीमा जारी इन्डो -नेपाल टि ट्वान्टी क्रिकेट प्रतियोगितामा सरस्वती क्रिकेट एकेडेमीलाई ६ विकेटले हराउँदै थन्डर–११ सेमिफाइनल प्रवेश गरेको छ ।

सरस्वती माविको खेल मैदानमा आज टस जितेर पहिलो ब्याटिङ गरेको सरस्वतीले १७.४ ओभरमा सबै विकेट गुमाउँदै ७९ रन बनाएको थियोे ।

सरस्वतीका लागि शौरभ ढकालले २० बल खेल्दै सर्वाधिक १८ रन बनाए । त्यस्तै, समिर महराले १४ बलमा १७ तथा सुनिल मिश्र र प्रेम सिंहले समान १२ रन बनाए । अन्य ब्याटरले दोहोरो अंकमा रन बनाउन सकेनन् ।

बलिङमा थन्डरका लागि रोहित राजवंशीले सर्वाधिक ४ विकेट लिए । त्यस्तै, एलिट राईले २ , शिव राजवंशी, चन्द्र भट्टराई, आयुष न्यौपाने र विजय भट्टराईले समान १ विकेट लिए ।

८० रनको विजयी लक्ष्य पछ्याउने क्रममा थण्डरले ७.४ ओभरमा ४ विकेट गुमाउँदै जित निकाल्न सफल भयो ।

थन्डरका लागि विराट डाँगीले नटआउट २३ बलमा ४३ रन बनाए । चन्द्र भट्टराईले १६ बलमा २० तथा नृत्यले ६ बलमा १६ रन जोडे ।

बलिङतर्फ सरस्वतीका युवराज श्रेष्ठले ३ र नवराज भुजेलले १ विकेट लिए । थन्डरका रोहित राजवंशी प्लेयर अफ दि म्याच भए । उनले नगद १ हजार रुपैयाँ र मायाको चिनो प्राप्त गरे ।

प्रतियोगिताको फाइनल चैत ४ गते हुनेछ । प्रतियोगिताको विजेता टोलीले ५० हजार र दोस्रो टोलीले ३० हजार रुपैयाँ तथा ट्रफी‌ प्राप्त गर्नेछ ।