एजेन्सी – कुशल मेन्डिसको शतकमा अस्ट्रेलियाविरुद्धको ओडिआई सिरिज घरेलु टोली श्रीलंकाद्वारा ‘क्लिन स्विप’ गरेको छ ।

शुक्रवार भएको दोस्रो ओडिआई खेलमा अस्ट्रेलियालाई १ सय ७४ रनको फराकिलो अन्तरले पराजित गर्दै श्रीलंकाले सिरिज ‘क्लिन स्विप’ गरेको हो ।

श्रीलंकाले दिएको २ सय ८२ रनको लक्ष्य पछ्याएको अस्ट्रेलिया २४.२ ओभरमा १ सय ७ रनमा समेटियो । अस्ट्रेलियाका लागि कप्तान स्टिभ स्मिथले सर्वाधिक २९ रन जोडे । उनले ३४ बलमा ३ चौका र १ छक्का प्रहार गरे ।

जोस इङ्ग्लिसले २७ बलमा ४ चौकाको सहयोगमा २२ तथा ट्राभिस हेडले १८ बलमा १८ रन जोडे । अस्ट्रेलियाका अन्य ब्याटरले दोहोरो अंकमा रन जोड्न सकेनन् । यो एसिया महादेशमा अस्ट्रेलियाले बनाएको सबैभन्दा कम स्कोर हो ।

श्रीलंकाका लागि दुनिथ विलालागेले ४ तथा आशिथा फर्नान्डो र वानिन्दु हसरंगाले समान ३ विकेट लिए ।

त्यसअघि कोलम्बोस्थित आर प्रेमदासा क्रिकेट स्टेडियममा टस जितेर ब्याटिङ रोजेको श्रीलंकाले निर्धारित ५० ओभरमा ४ विकेट गुमाएर २ सय ८१ रनको योगफल तयार गर्यो ।

श्रीलंकाका लागि प्लेयर अफ द म्याच समेत भएका मेन्डिसले सर्वाधिक १ सय १ रन जोडेका थिए । उनले १ सय १५ बलमा ११ चौका प्रहार गरेका थिए ।

कप्तान चरिथ असलंकाले ६६ बलमा नट आउट ७८ रन जोड्दा ओपनर निसान मधुशंका ५१ रनमा आउट भए ।

जानिथ लियानागे २१ बलमा नट आउट ३२ रन जोड्दा ओपनर पथुम निशंका ६ रनमा आउट भए । अस्ट्रेलियाका लागि बेन ड्वारस्विस, सिन एबोट, आरोन हार्डी र एडम जाम्पाले समान १ विकेट लिए ।

अस्ट्रेलिया अर्को साताबाट सुरु हुने च्याम्पियन्स ट्रफीको तयारीमा रहेको छ । अस्ट्रेलियाले पहिलो ओडिआई ४९ रनले गुमाएको थियो ।

श्रीलंका भने च्याम्पियन्स ट्रफीमा छनोट हुन सकेको थिएन । सन् २०२३ मा भारतमा भएको ओडिआई विश्व कपको शीर्ष ८ मा नअटाएका कारण श्रीलंका भने च्याम्पियन्स ट्रफीका लागि छनोट हुन सकेको थिएन ।

समूह बी मा रहेको अस्ट्रेलियाले २२ फेब्रुअरीमा इङ्ग्ल्याण्डसँग खेल्दै प्रतियोगिताको सुरुवात गर्नेछ । अस्ट्रेलिया रहेको समूहमा इङ्ग्ल्याण्ड, अफगानिस्तान र दक्षिण अफ्रिका रहेका छन् ।