एजेन्सी – ओपनर शुभमन गिलको शतक सहयोगमा भारतले इङ्ग्ल्याण्डसँगको ओडिआई सिरिज क्लिन स्विप गरेको छ ।

तेस्रो ओडिआई खेलमा बुधवार १ सय ४२ रनको फराकिलो जितका साथ भारतले सिरिज क्लिन स्विप गरेको हो । ३ खेलको ओडिआई सिरिज भारतले ३-० ले जितेको हो ।

३ सय ५७ रनको विशाल लक्ष्य पछ्याएको इङ्ग्ल्याण्ड ३४.२ ओभरमा २ सय १४ रनमा समेटियो । इङ्ग्ल्याण्डका लागि गस एटकिन्सन र टोम बेन्टनले समान रुपमा सर्वाधिक ३८ रन जोडे ।

ओपनर बेन डकेट ३४, जो रुट २४, ओपनर पिल साल्ट २३ तथा ह्यारि ब्रुक १९ रन बनाए । भारतका लागि अक्षर पटेल, अर्शदिप सिंह, हर्षित राना र हार्दिक पाण्ड्याले समान २ तथा वासिंटन सुन्दर र कुलदिप यादवले समान १ विकेट लिए ।

त्यसअघि अहमदाबादमा रहेको नरेन्द्र मोदी क्रिकेट स्टेडियममा टस हारेर ब्याटिङको निम्तो पाएको भारतले निर्धारित ५० ओभरको अन्तिम बलमा ३ सय ५६ रन जोड्दै अल आउट भयो ।

भारतका लागि ओपनर शुभमन गिलले सर्वाधिक १ सय १२ रन जोडे । उनले १ सय २ बलको सामना गर्दै १४ चौका र ३ छक्का प्रहार गरेका थिए । श्रेयश अय्यरले ६४ बलमा ८ चौका र २ छक्काको सहयोगमा ७८ बनाए ।

विराट कोहली ५५ बलमा ५२, केएल राहुल २९ बलमा ४० तथा हार्दिक पाण्ड्या १७ रन बनाए । इङ्ग्ल्याण्डका लागि आदिल राशिदले ४, मार्क वुडले २ तथा गस एटकिन्सन, जो रुट र सकिब मोहम्मदले समान १ विकेट लिए

सिरिजको पहिलो र दोस्रो दुवै खेल भारतले ४ विकेटले जितेको थियो । यसअघि भएको टि ट्वान्टी सिरिज पनि भारतले जितेको थियो ।