कैलाली (हाम्रो खेलकुद)- सिवाइसी अत्तरिया धनगढीमा जारी अर्जुन ट्रफी राष्ट्रिय क्रिकेट प्रतियोगिताको फाइनलमा पुगेको छ ।

डिसिए धनगढीलाई दोस्रो सेमिफाइनल आइतवार ६ विकेटले हराउँदै अत्तरिया उपाधि नजिक पुगेको हो ।
अत्तरियाले फेण्ड्स क्लब डडेल्धुरासँग सोमवार फाइनल खेल्नेछ।

फाप्ला अन्तराष्ट्रिय क्रिकेट मैदानमा टस जितेर पहिले ब्याटिङ गरेको धनगढीले २० ओभरमा सवै विकेट क्षतिमा एक सय ८ रन मात्रै बनाउन सक्यो ।

धनगढीका मिलन बोहोराले १८ बलमा २८ रन बनाए । अभिषेक पालले २७, दिपेन्द्र सिंह ऐरीले १५ रन र राहुल भण्डारीले १३ रन बनाए । अन्य ब्याटरले दोहोरो अंकमा रन बनाउन सकेनन् । धनगढीका ४ खेलाडी शुन्यमा आउट भए ।

अत्तरियाका लागि विवेक यादव र कमल गुप्ताले समान २ , दिपेश कँडेल, रसिद खान र साहव आलमले समान १ विकेट लिए ।  

एक सय ९ रनको लक्ष्य पछ्याएको अत्तरियाले १५ ओभरमा ५ विकेट क्षतिमा जित हासिल गर्यो ।अत्तरियाका लागि शंकर रानाले अर्धशतक बनाए । ५५ बलमा शंकरले ४ छक्का र ३ चौकासहित नटआउट ५६ रन बनाए ।

२४ रन बनाएका दीपेशले शंकरसँग चौथो विकेटका लागि ७१ रनको साझेदारी गरे । भीम सार्कीले १६ रन जोडे । धनगढीका हिक्मत महराले २, ललित राजवंशी र भोजराज भट्टले समान १ विकेट लिए ।

अत्तरियाका शंकर राना नवजीवन सहकारी संस्था प्लेयर अफ द म्याच भए र उनले १० हजार रुपैयाँसहित ट्रफी पाए ।

नेपाल क्रिकेट संघको बार्षिक क्यालेण्डरमा समावेश गो ड्रिर्मसको आयोजनामा जारी प्रतियोगिताको विजेताले १० लाख र‌ दोस्रो टोलीले ५ लाख सहित ट्रफी पाउनेछन् ।