काटमाडौं(हाम्रो खेलकुद) – कुशल भुर्तेलको अलराउण्ड प्रदर्शनको सहयोगमा फ्रेन्ड्स युथ क्लब डडेलधुरा धनगढीमा जारी अर्जुन ट्रफी राष्ट्रिय क्रिकेट प्रतियोगिताको फाइनलमा प्रवेश गरेको छ ।

पहिलो सेमिफाइनलमा शनिवार न्यु होराइजन बुटवललाई ५ विकेटले हराउँदै डडेलधुरा फाइनल पुगेको गहो । डडेलधुराले उपाधिका लागि सोमवार डिसीए धनगढी र सिवाईसी अत्तरिया मध्ये एक‌सँग फाइनल हुनेछ ।

८३ रनको सामान्य लक्ष्य डडेलधुराले १५ ओभरमा ५ विकेट गुमाएर पूरा गर्यो । डडेलधुराको जितमा ओपनर कुशलले सर्वाधिक ४६ रन जोडे । उनले २६ बलमा ६ चौका र २ छक्कका प्रहार गरे । अर्का ओपनर आयुष्मान बमले १६ रन बनाए ।

कप्तान सन्दीप जोरा ६ र किरण ठगुन्ना ८ रनमा नट आउट रहे । होराइजनका लागि प्रिन्स पालले ३ , महेश भार र निर्मल गुरुङले समान १ विकेट लिए ।

त्यसअघि फाप्ला क्रिकेट मैदानमा टस जितेर ब्याटिङ गरेको होराइजन १६.१ ओभरमा ८२ रनमा समेटिएको थियो ।

होराइजनका लागि आरिफ खानले १६ बलमा सर्वाधिक २० रन जोडे । दिपक डुम्रे १८ र निश्चल ज्ञवाली १४ रनमा आउट भए । होराइजनका अन्य ब्याटरले दोहोरो अंकमा रन जोड्न सकेनन् ।

डडेलधुराका लागि कुशलले ३.१ ओभरमा १९ रन खर्चिएर ५ विकेट लिए । अजय चौहानले ३ , हेमन्त धामी र अशोक धामीले समान १ विकेट लिए ।

प्रतियोगिताको विजेताले १० लाख र दोस्रो टोलीले ५ लाख रुपैयाँ सहित ट्रफी पाउनेछन् । प्रतियोगिताको सर्वोकृष्ट खेलाडीलाई १ लाख, उत्कृष्ट ब्याटर, उत्कृष्ट बलर र उदयमान खेलाडीले समान ५० हजार रुपैयाँ पाउनेछन्।