सुमन अधिकारी,बुटवल

लुम्बिनी खुकुरी क्लब जारी रुपन्देही सुपरलिग क्रिकेट प्रतियोगिताको फाइनल प्रवेश गरेको छ ।

सेमिफाइनल खेलमा शुक्रवार तिरुपति क्रिकेट क्लबलाई ३० रनले पराजित गर्दै खुकुरीले फाइनलको यात्रा तय गरेको हो ।

भैरहवास्थित सिद्धार्थ क्रिकेट मैदानमा टस हारेर ब्याटिङको निम्तो पाएको खुकुरीले निर्धारित ५० ओभरमा ९ विकेटको नोक्सानीमा २ सय ३४ रनको बलियो योगफल खडा गर्यो ।

टोलीका अमर मिश्रा र समिर अलीले अर्धशतकीय पारी खेले । अमरले ७१ र समिरले ५४ रन बनाए । प्रज्वल थापाले २२, अन्तिम थापाले २१, अजयकुमार चौहानले अविजित १८ र दुर्गेश गुप्ताले १२ रन जोडे ।

तिरुपतिका तुलबहादुर थापा र विपिन न्यौपानेले समान ३, रुपेश कुर्मीले २ र सन्दीप मौर्यले १ विकेट लिए ।

जवाफी ब्याटिङमा तिरुपति ४७.१ ओभरमा २ सय ४ रन बनाउँदा अलआउट भयो र उपाधि होडबाट बाहिरियो । टोलीका एजाजुल हकले ४६, तुलबहादुर थापाले ४१, अर्निको यादवले २५, डेभिड थापाले २०, रुपेश कुर्मीले १० रन बनाए।

लुम्बिनी खुकुरीका सेजाद आलम, अमर मिश्रा र अजयकुमार चौहानले समान २, दुर्गेश गुप्ता र सुप्रित घिमिरेले समान १ विकेट लिए । लुम्बिनी खुकुरीका अमर मिश्रा प्लेयर अफ द म्याच भए ।

रुपन्देही क्रिकेट संघको आयोजना र सिद्धार्थनगर नगरपालिकाको सहप्रायोजनामा जारी प्रतियोगिताको विजेता टिमले १ लाख १ रुपैयाँ र दोस्रोले ५० हजार १ रुपैयाँसहित ट्रफी, मेडल र प्राप्त गर्नेछन् ।

प्रतियोगिताको म्यान अफ द सिरिजले १५ हजार, बेष्ट ब्याटर, बेष्ट बलर र उदयीमान खेलाडीले समान ५ हजार रुपैयाँ प्राप्त गर्नेछन् ।

तिलोत्तमा क्रिकेट क्लब र वेष्टर्न क्रिकेट क्लबबीचको आइतवार दोस्रो सेमिफाइनल हुनेछ ।