काठमाडौं(हाम्रो खेलकुद) – धनगढीमा जारी अर्जुन ट्रफी राष्ट्रिय क्रिकेट प्रतियोगितामा क्रिकेट प्रतियोगिताको सेमिफाइनल समीकरण पूरा भएको छ ।

लिग चरणको अन्तिम खेल शुक्रवार सकिएसँगै सेमिफाइनल समीकरण पूरा भएको हो । प्रतियोगिताको सातौं दिन भएको समुह ‘बी’ अन्तर्गत भएको लिग चरणको अन्तिम खेलमा सिवाइसी अत्तरियाले न्यु होराइजन बुटवललाई ७८ रनले हरायो ।

यो जितसँग अत्तरिया समुह ‘बी’ को विजेता बनेर सेमिफाइनल प्रवेश गर्यो । यो समूहबाट होराइजन उपविजेता बन्दै सेमिफाइनल प्रवेश गर्यो ।

समूह ‘ए’ बाट विजेता बन्दै फ्रेन्ड्स युथ क्लब डडेलधुरा र उपविजेताका रुपमा डिसिए धनगढी अन्तिम चारमा पुगिसकेका छन् गरिसकेका थिए ।

१ सय ८९ रनको लक्ष्य पछ्याएको होराइजनले २० ओभरमा ८ विकेट गुमाएर १ सय १० रन जोड्यो । होराइजनका लागि प्रतिक श्रेष्ठले सर्वाधिक १८ रन जोडे। तुलवहादुर थापा १७, बीरवहादुर मगर १५ र निश्चल ज्ञवाली १२ रनमा आउट भए ।

अत्तरियाका लागि विवेक यादव, शाहब आलम र राशिद खानले समान २, कमल गुप्ता र दिपेश कँडेलले समान १ विकेट लिए ।

फाप्ला क्रिकेट मैदानमा टस हारेर पहिले ब्याटिङ गरेको अत्तरियाले निर्धारित २० ओभरमा ५ विकेट क्षतिमा १ सय ८८ रन बनायो ।

अपराजित रुपमा सेमिफाइनल पुगेको अत्तरियाका लागि भीम सार्कीले ५८ रन जोडे । उनले ३९ बलमा ८ चौका प्रहार गरे

भीमले चौथो विकेटका लागि विवेक यादवसँग ७७ रनको साझेदारी पनि गरे । विवेकले ३८ बलमा ३ चौका र ३ छक्काको सहयोगमा ५१ रन जोडे । यस्तै भीमले तेस्रो विकेटका लागि शंकर रानासँग पनि ५१ रनको साझेदारी गरे ।

शंकर २० बलमा ३ चौका र २ छक्काको सहयोगमा ३१ रनमा आउट भए । कप्तान सन्तोष कार्कीले १२ बलमा २३ रन बनाए । बुटवलका लागि निर्मल गुरुङले २, वीर मगर, विप्रोसन केसी र तुलवहादुर थापाले समान १ विकेट लिए ।

प्रतियोगिताको पहिलो सेमिफाइनलमा शनिवार समुह ‘ए’ को विजेता फ्रेन्डस युथ क्लब डडेल्धुरा र समुह ‘बी’ को उपविजेता न्यु होराइजन बुटवलबिच प्रतिस्पर्धा हुनेछ ।

आइतवार हुने दोस्रो सेमिफाइनल खेलमा समुह ‘बी’ को विजेता सिवाइसी अत्तरिया र समुह ‘ए’ को उपविजेता डिसिए धनगढी फाइनल प्रवेशका लागि खेल्नेछन् ।

फाइनल साेमवार हुनेछ । प्रतियोगिताको विजेताले १० लाख र दोस्रो टोलीले ५ लाख रुपैयाँ सहित ट्रफी पाउनेछन् ।

प्रतियोगिताको सर्वोकृष्ट खेलाडीलाई १ लाख, उत्कृष्ट ब्याटर, उत्कृष्ट बलर र उदयमान खेलाडीले समान ५० हजार रुपैयाँ पाउनेछन्।