एजेन्सी – घरेलु टोली भारतले इङ्ग्ल्याण्डसँगको पहिलो ओडिआईमा जित हासिल गरेको छ ।

भारतले बिहीवार भएको खेलमा ४ विकेटको जित हात पारेको हो । जितसँगै ३ खेलको ओडिआई सिरिजमा भारतले १-० को अग्रता लिएको छ ।

२ सय ४९ रनका मध्यम लक्ष्य भारतले ३८.४ अ‍ेभरमा ६ विकेट गुमाएर पूरा गर्यो । भारतको जितमा शुभमन गिल, अक्षर पटेल र श्रेयस अय्यरले अर्धशतक प्रहार गरे । गिलले सर्वाधिक ८७ रन जोडे । उनले ९६ बलमा १४ चौका प्रहार गरे ।

अय्यरले ३६ बलमा ९ चौका र २ छक्काको सहयोगमा ५९ रन जोडे । पटेलले ४७ बलमा ६ चौका र १ छक्काको सहयोगमा ५२ रन जोडे । यसश्वी जैसवाल १५ रनमा आउट हुँदा रविन्द्र जडेजा १२ रनमा नट आउट रहे ।

इङ्ग्ल्याण्डका लागि सकिब मोहम्मद र आदिल राशिदले समान २, जोफ्रा आर्चर र जोकेब बेथहेलले समान १ विकेट लिए ।

त्यसअघि नागपुरमा टस जितेर ब्याटिङ रोजेको इङ्ग्ल्याण्ड ४७.४ ओभरमा २ सय ४८ रनमा समेटियो । इङ्ग्ल्याण्डका लागि कप्तान जस बटलरले सर्वाधिक ५२ रन जोडे । उनले ६७ बलमा ४ चौका प्रहार गरे ।

जोकेब बेथहेलले ६४ बलमा ३ चौका र १ छक्काको सहयोगमा ५१ रन जोडे । ओपनर फिल साल्ट २६ बलमा ५ चौका र ३ छक्काको सहयोगमा ४३ रनमा आउट भए । बेन डकेट ३२ रनमा आउट हुँदा जोफ्रा आर्चर २१ रनमा नट आउट रहे ।

जो रुट १९ तथा लियम लिभिङ्स्टोन १० रनमा आउट भए । भारतका लागि हर्षित राना र रविन्द्र जडेजाले समान ३, कुलदिप यादव, मोहम्मद सामी र अक्षर पटेलले समान १ विकेट लिए ।

यसअघि भारतले इङ्ग्ल्याण्डविरुद्धको ५ खेलकोे टि ट्वान्टी आई सिरिज ४-१ ले जितेको थियो। दोस्रो ओडिआई आइतवार हुनेछ ।