काठमाडौं(हाम्रो खेलकुद) – धनगढीमा जारी अर्जुन ट्रफी राष्ट्रिय क्रिकेट प्रतियोगितामा घोडाघोडी-११ ले सान्त्वना जित हात पारेको छ ।

सान्त्वना जित निकाल्नेक्रममा घोडाघोडीले फ्रेन्डस युथ क्लब डडेलधुरामाथि १ विकेटको रोमाञ्चक जित हासिल गरेको छ । डडेलधुराले दिएको १ सय २५ रनको लक्ष्य घोडाघोडी–११ ले १९.५ ओभरमा ९ विकेट गुमाएर पूरा गर्यो ।

घोडाघोडीलाई जिताउन आयुव चन्दले सर्वाधिक ३३ रन जोडे । उनले २४ बलमा १ चौका र २ छक्का प्रहार गरे । योगेश भाट २९ बलमा २० रनमा आउट हुँदा कप्तान शेर मल्ल १८ रनमा नट आउट रहे ।

डडेल्धुराका लागि हेमन्त धामीले ३ विकेट, अभिषेक गौतमले २ विकेट तथा कुशल भुर्तेल, गजेन्द्र बोहोरा र कृस ऐरले समान १ विकेट लिए ।

त्यसअघि फाप्ला अन्तराष्ट्रिय क्रिकेट मैदानमा टस जितेर पहिले ब्याटिङ गरेको डडेल्धुराले निर्धारित २० ओभरमा ८ विकेट गुमाएर १ सय २४ रनको योगफल तयार गर्यो ।

डडेल्धुराका लागि नट आउट रहँदै विनोद भण्डारीले सर्वाधिक ५६ रन जोडे । उनले ४७ बलमा २ चौका र ४ छक्का प्रहार गरे । कुशल भुर्तेल १३ रन, आयुष्मान बम ११ रन र गजेन्द्र बोहोरा १० रनमा आउट भए ।

डडेलधुराका अन्य ब्याटरले दोहोरो रन अंक जोड्न सकेनन् । घोडाघोडीका लागि नरेन साउँदले ४, सुर्य श्रेष्ठले २ विकेट तथा भुपेश जोशी र सञ्जय बोहोराले समान १ विकेट लिए ।

समूह ए बाट डडेलधुरा र डीसिए धनगढी सेमिफाइनलमा प्रवेश गरेका छन् । डडेलधरा समूह विजेता तथा धनगढी उपविजेता बनेका छन् । समूह बी बाट सिवाईसि अत्तरिया सेमिफाइनल पुगिसकेको छ । समूह बी बाट सेमिफाइनल पुग्ने अर्को टोलीको पक्का भने शुक्रवार हुनेछ ।

आजै भएको पहिलो खेलमा दशरथ चन्द क्रिकेट एकेडेमी बैतडीले सिइसी काठमाडौंलाई पराजित गरेको थियो । प्रतियोगिता माघ २८ गतेसम्म सञ्चालन हुनेछ । प्रतियोगिताको विजेताले १० लाख र दोस्रो टोलीले ५ लाख रुपैयाँ सहित ट्रफी पाउनेछन् ।

प्रतियोगिताको सर्वोकृष्ट खेलाडीलाई १ लाख, उत्कृष्ट ब्याटर, उत्कृष्ट बलर र उदयमान खेलाडीले समान ५० हजार रुपैयाँ पाउनेछन । प्रत्येक खेलका म्यान अफ द म्याचले १० हजार रुपैयाँ प्राप्त गर्नेछन्।

प्रतियोगितामा देशभरका ८ वटा क्लबको सहभागिता रहेको छ । सहभागी टिमलाई दुई समुहमा विभाजन गर्दै लिगकम नकाउटका आधारमा प्रतियोगिता भईरहेको छ ।

प्रतियोगिताको समुह ‘ए’ मा डिसिए धनगढी, फ्रेण्ड्स युथ क्लब डडेल्धुरा, घोडाघोडी–११ र बोष्टन क्रिकेट झापा रहेका छन् ।

यस्तै समुह ‘बी’ मा सिवाईसी अत्तरिया, क्रिकेट एक्सिलेन्स सेन्टर काठमाण्डौं, न्यु होराईजन वुटवल र दशरथ चन्द एकेडेमी बैतडी रहेका छन् ।